Pesaka seni raban etnik Sarawak dijadika produk dagang temuai negeri

Raban seni ari mayuh bengkah gerempung mungkal program Malam Seni Sarawak di Kuching malam tadi.

Dikarang Chris Bishop

KUCHING, Mac 24: Pesaka seni ari mayuh bengkah raban etnik di Sarawak patut chakah agi diangkat nyadi produk dagang temuai.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah pechaya produk nya ulih nyaup nambah penatai pemisi negeri, komuniti enggau orang sesiku.

“Pesaka seni ke unik sereta manah ari genap raban etnik di negeri tu ukai semina dinan dikena ngenanka identiti peturun kitai jemah ila.

“Tang tau mega diangkat nyadi produk dagang temuai. Pesaka seni ke bemacham tu tau nyadi tikit Sarawak nyadi palan pematak temuai ke tebilang di dunya,” ku Abdul Karim.

Iya mansutka jaku nya rambau bejadi Malam Main Asal Sarawak ke diatur di Dewan Santapan, Begunan Dewan Undangan Negeri (DUN) Lama ditu, malam tadi.

Hii mangkung gong nyadika simbolik bejadi Malam Main Asal Sarawak.

Teks jaku Abdul Karim dibacha Sekretari Mendam Opis Menteri, Hii Chang Kee ti datai ngarika iya.

Iya nambah Perintah Negeri chakah ngemansang sereta ngelaku main asal sereta seni tradisyenal Sarawak.

Ku iya, ngembuan lebih 47 sub etnik, negeri tu kaya enggau bemacham seni ari mayuh bengkah bansa.

Malam Main Asal Sarawak malam tadi dirichah raban seni ari Dayak Cultural Foundation (DCF), Gerempung Dayak Bidayuh Nasional(DBNA), Gerempung Melanau, Federasyen Orang Ulu Malaysia(FORUM), Federasyen Cina enggau Kuching India Vandini Fine Arts.

Bela datai ngemata Kaban Lembaga Majlis Seni Sarawak(MSS) Tan Sri Abang Khalid Abang Marzuki enggau Robert Menua Salleh sereta CEO MSS Sharkawi Amit. — DayakDaily