Michael pulai menua asal di Rh Jampong, diintu 2 malam sereta ditumbak Hari Satu

Rh Jampong di Nanga Banyau, Kapit.

Dikarang Chris Bishop

KAPIT, 23 Mac: Bangkai Michael Garing ke diukum gantung di Rumah Jil Changi di Singapura pagi kemari dibai pulai ke menua asal iya di Rumah Jampong, Nanga Banyau, Kapit, urung jam 3 tengahari tu tadi.

Pengudah terengkah di Palan Penerbai Bilun Sibu ari Singapura jam 10.20 pagi tadi, bangkai niang dibai ngena ‘speed bot’ mudik nuju Rh Jampong urung jam 12.30 tengahari.

Nitihka penerang Kapitan peranak Sarawak ba Skudai Johor, Emen Koh, apai indai niang (Garing Kayan enggau Ensiring Garman) nerima nasit ke udah nuntung sida sebilik kelebih agi Micheal.

“Sida sebilik enggau kaban belayan bukai nerima nasit ke udah nuntung Michael. Perintah Malaysia pan udah nguji ngapil, minta ukum gantung diganti enggau ukum bukai tang enda dinah Perintah Singapura,” ku Emen ke bela di Rh Jampong seharitu.

Emen ke mega Chairman Gerempung Terabai Menua Johor madah niang deka diintu pengelama dua malam di Rh Jampong nengah Adat Iban lalu disadang ditumbak di Kubur Islam Kapit kena Hari Satu tu.

Dulu agi ari tu, iya nya kena 22 Julai 2015, ba dalam Rumah Jil Changi niang udah masuk agama Islam lalu nguna nama Muhammad Ariff Sufi sereta ngemeranka pengidup chara Islam.

Michael diukum gantung pengudah diputuskan Kort Tinggi Singapura salah ngereja penyalah munuh ba taun 2015 alai pemutus nya dinanka Kort Apil (Singapura) ba taun 2017.

Surat bantah ari Perintah Malaysia ke dianjung ngagai Singapura ngambi ulih nganti ukum gantung nya ngagai ukum jil seumur idup enda dinah Perintah Singapura.

Niang begulai enggau tiga iku pangan bukai diriputka ngerumpak di Jalai Kallang, Singapura, ba taun 2010 ti ngujungka siku pengereja pengawa berumah, Shanmuganathan Dillidurai mati lalu tiga iku agi ke bukai bakal.

Kaling niang ke bukai ke sama bela ngereja penyalah nya, Tony Imba diukum jil seumur idup sereta diukum rutan 24 kali.

Hairee Landak mega diukum jil pengelama 33 taun sereta dirutan 24 kali.

Donny Meluda ti ngelari kediri pengelama lebih enam bulan bela diukum jil 33 taun sereta dirutan 24 kali.

Maya ditangkap ngereja penyalah nya, Michael berumur 21 taun. — DayakDaily