Patut bisi pangku pengawa Sapit Menteri Besai Kedua, ku Darell

Parti Warisan Sabah logo

KUALA LUMPUR, Jun 8: Menteri Besai dikearap ulih berundingka pekara sentang numbuhka pangku pengawa Sapit Menteri Besai Kedua ti diarika Kepala Menteri Sabah enggau Sarawak dalam rintai Kabinet di renggat perintah besai.

Pia ku pengandal Sapit Presiden Parti Warisan Sabah (Warisan) Darell Leiking ngagai Tun Dr Mahathir Mohamad.

Darell ke mega Kaban Parlimen (MP) Penampang madahka juluk nya dalam program randau 100 Hari Malaysia Baharu di Astro AWANI malam tadi.

Pengawa nya ku iya, dikena ngempitka seraka entara Semenanjung enggau Sabah sereta Sarawak.

Penemu tu digaga nengah kaul numbuhka Malaysia ti mega ngempung Sabah enggau Sarawak nyadi kaban kunsi.

“Sabah tu ukai nengeri ke biasa, tang kitai iya nya kaban kunsi ti numbuhka Malaysia: Sabah, Sarawak enggau Semenanjung. Nya alai berindik ari kitai sama kaban, kitai mega ngarika Perintah Besai nyadi kaban kunsi dalam gempung Malaysia,” ku iya ba portal nya.

“Tuju kitai iya nya deka sama begulai ngintu pengelikun menua. Ba runding aku, pangku pengawa Sapit Menteri Besai tu, nyema dipenggi Kepala Menteri Sabah enggau Sarawak enda ibuh diberi elawin, ulih ngelimat belanja. Sida semina ngarika dalam rintai menteri,” ku iya.

Ngenang pekara nya, Darell madah kededua Kepala Menteri Sabah enggau Sarawak tu mega patut sama enggau aum Kabinet.

“Sida ulih ngeripot pekara ti nyadi di Sabah enggau Sarawak lebuh baum ninting Hari Tiga lalu sebarang pemutus ba renggat menteri di perintah besai, sida meseti ngeripot baru ba aum Kabinet di negeri tiap Hari Lima,” ku iya nandu.

Taja pan nemu pelin Dr Mahathir numbuhka saiz rintai kabinet ke mit agi, Darell tetap ngarap mayuh agi pengari ari Sabah enggau Sarawak ba renggat perintah besai.

“Nyema sebedau tu bisi enam (menteri enggau sapit menteri) ari Sabah enggau Sarawak, aku ngasaika nyema bisi tujuh manah agi.

“Chunto nya, nyema suba kitai bisi pengawa Menteri Wang II, lapa enda meri pangku pengawa nya ngagai pengari ari Borneo, laban kitai mega patut ngintu aset enggau pekara wang di Borneo,” ku iya. — DayakDaily