Anang betenah PBDS Baru

Julius Enchana

KUCHING, 10 Julai: Sekretari besai Parti Bansa Dayak Sarawak (PBDS) Baru, Julius Enchana, nyangkal tuduh ti madah parti nyadi kaling Gabungan Parti Sarawak (GPS) enggau Pakatan Harapan (PH).

Julius, nengah surat penerang berita seharitu, netapka tuduhnya semina jaku petenah orang ti enda rindu ke politik Dayak.

“PBDS Baru enda kala bekaling enggau sebarang parti kelimpah ari komponen ti bekaban ba Sarawak Baru.

“Jaku ti ngumbai PBDS Baru kaling GPS enggau PH nya semina berita bula lalu semina ‘propaganda war’ ti deka meda parti tu enda ulih angkat,” ku iya.

Julius mega nyangkal tuduh diak PBDS Baru ditupi GPS tauka PH ngambi tau dikena mecah undi rayat.

Iya pechaya tuduh ke bakanya semina “perang psikologi” dikena ngelamun runding rakyat enda nyukung parti.

“Kenyau ari PBDS Baru direjister ba taun 2013, kami dikumbai kaling BN (Barisan Nasional). Tu mega berita bula ke ngujung ka parti tu pedis endar nerima sukung ketegal petenah,” tandu Julius.

PBDS Baru, ku iya, enda kala minta diri nyadi kaban BN, GPS tauka PH.

Iya madah pengawa tu bisi ripih enggau sempekat sereta ukai pekara sebut enggau mulut aja.

“Nya alai, aku berasai endar tekenyit ati meda randau sebelah media rama ke balat endar mejah parti tu. Aku ke nyadi seketeri besai parti tu enda kala nulis sebarang surat peminta minta nyadi kaban komponen GPS enggai PH.

“Pia mega sekreteri besai ke dulu baka James Jalai enggau Anthony Nais,” ku Julius.

Ngenang kaul ke sama, Julius ngelalau semua kaban lama parti tu pulai baru lalu nyaup negapka agi PBDS Baru.

Kelimpah ari nya, iya mega minta bansa Dayak nyukung PBDS Baru ti ngarika bansa Dayak ba menua Malaysia.

“PBDS Baru parti ti suntuk. Kitai nadai belanja besai baka PBDS ti dulu, tang penumbuh PBDS Baru tu ketegal PBDS suba udah dikinsil.

“Nya alai, kita ke kala nyadi kaban PBDS suba anang sanggu nyukung baru parti Dayak ngambika ulih angkat sekali agi,” ku iya.

Iya mega madah diak kaban kunsil besai ke diatu sedia nerima penemu ari ketuai-ketuai PBDS ti dulu baka Tan Sri Leo Moggie, Datuk Edmund Langgu, Gabriel Adit enggau ke bukai.

“Ya, kami enda ibuh dijali sida enggau duit ringgit. Cukup meh dijali enggau penemu. Enti kitai sama sayau ke parti enggau bansa kitai, nadai salah orang lama enggau orang baru besilih buah penemu,” ku Julius. — DayakDaily