Tusun Ke 5 – Karam di Darat, penusah ke majak nyadi sereta balat ngirau

Dinding pemagi (firewall) dipeda digaga misahka tetiap bilik di Rh Collin.

“This article is a translation of Longhouse fires in Sarawak, a growing concern – Part 5 originally published on January 10, 2019.”

Translation by Chris Bishop

NENGAH Tusun Kesatu nyentuk ngagai Keempat, penyampau kes ke majak nambah dalam timpuh tiga taun, idea enggau chara mutar, kebuah penusah nyadi sereta program nerenak pemereti ngintu pengelikun bekenaka api bisi dipejurai.

Konsep baru rumah panjai tradisyenal ke disikap enggau penyeliah penusah angus ke dikemendar Perintah Negeri sereta pelin insuran bela mega dipejurai.

Ba Tusun Keempat, DayakDaily nusuika cherita Rumah Panjai Collin Sait di Bukit Peninjau, Bakong di Miri ti udah nempa sejarah nyadi rumah panjai Iban keterubah digaga nitihka konsep baru tu ba taun 2017.

Ba tusun penudi kenang tu, pengarang nemuai ngagai Rh Collin, ngasaika pengidup di rumah panjai tradisyenal-moden.

Rh Collin Sait

Didirika urung 40km penyauh ari Mengeri Miri, pejalai nuju Rh Collin nepan entuka ngambi timpuh 45 minit.

Nengah bantu raban pemesai Opis Bomba Miri, DayakDaily nemuai ngagai rumah panjai tu alai penatai kami seraban diambat Tr Collin Sait sebilik sereta sida sekayu rumah.

Berengkah digaga ba taun 2015, rumah panjai 23 bilik tu tembu ba pun taun 2017. Struktur chukup manah lalu nitihka pelin arkitek moden ti bela ngenanka pendiau asal rumah panjai tradisyenal.

Ruai chukup lantang endur diau alai tetiap bilik digaga siti bilik besai, tiga bilik tinduk, bilik mandi, bilik agu enggau dapur.

Seratus sepuluh iku peranak ke nguwan Rh Collin ukai semina ngasaika bekal lektrik 24 jam tang mega bisi bekal ai beresi enggau dinding pemagi (firewall) entara bilik. Bilik agu dipeda udah digaga enggau manah lalu disambung ngagai tangki ‘septik’.

Pendiau dalam bilik besai Rh Collin ti meri awak ngagai angin tama.

Ba penemuai kami maya nya, bala lelaki rumah panjai tu kiruh berandau enggau raban pemesai Bomba sentang atur numbuhka Tim Sukarela Bomba alai sida ke indu kiruh nyendia pemakai di dapur.

Collin, 75, enggau pengaga ati nusuika pendiau rumah panjai sida lalu berasai temegah enggau ubah ke udah diadu.

“Sebedau tu kami diau ba rumah nyembuah besemak enggau pangan diri. Ba taun 2008, kami udah mutus deka ngaga rumah panjai alai kami bisi minta penemu ari ijinsi ke bekaul sentang chara ke patut.

“Pengelama nganti, lalu ba taun 2015, kami diberi siti perambu ke dikumbai Skim Rumah Panjang Mesra Rakyat”.

Projek pemungkal Opis Menteri Pengawa Berumah enggau Kunsil Kandang Menua tu begunaka belanja RM2.65 juta sereta dikemujur Gempung Pemansang Pengawa Berumah (HDC).

Raban orang indu Rh Collin nyendiaka pemakai ba dapur ke digaga di luar alai tu siti chara ke pemadu engkeman ba atur nyeliah penusah angus.

“Ungkus dikena ngaga siti unit bilik RM115,589. Pemanah ditu iya nya 30 peratus tauka RM38,859 sabsidi perintah. Kami ngulihka lun ari bank dikena mayar laluh RM77,179. Tetiap ruang bilik diatu mayar RM327.10 sebulan ungkup timpuh 25 taun alai bank semina netapka bungai 2 peratus setaun,” ku Collin.

Peranak Rh Collin nyadi raban orang ti keterubah nerima surat pala tanah rumah panjai ke disempulang enggau insuran ti ngintu kededua orang bempu bilik enggau reta.

Collin meri jaku puji ngagai teknologi baru diatu ti ngujungka sida ulih diau ba siti rumah (panjai) ke likun ti bisi sistem ngerak enti api bisi nyadi.

“Aku mega meri puji ngagai Perintah Negeri enggau Bomba ketegal udah meri kami peluang nirika rumah panjai tu,” ku iya.

Gambar ruai Rh Collin.
Wayar lektrik disambung enggau manah di Rh Collin.
Perengka madam api enggau dinding pemagi ba belakang rumah panjai.

Pengudah ngulu tiga bengkah program Bomba Komuniti di Miri, Collin madah deka numbuhka unit nya ba rumah panjai iya.

“Aku udah belajar sentang chara ngintu pengelikun ari api, atur nyeliah enggau sekeda ke bukai ari Bomba. Pekara tu chukup berat alai aku deka minta penemu ari Opis Bomba Zon Miri sentang atur numbuhka unit nya,” ku iya.

Ngenang kaul ke sama, Ketuai Opis Bomba Miri Law Poh Kiong bela meransang orang indu Rh Collin ngulu program ngintu pengelikun bekenaka api ke bisi diatur Bomba.

Law madah bisi sekali nyadi diak siku orang indu enda nemu baka ni deka nguna perengka madam api alai orang indu nya ku iya lalu nikauka tung (pemadam api) ngagai api.

Pengarap baru – Rh Salin Abong

Meretika kes angus rumah panjai ke majak nyadi dalam timpuh tiga taun tu, seraban orang ti ngarika siti rumah panjai 34 bilik betuaika Tr Salin Abong ari Sg Selulit, Bok, Tinjar di Miri, bisi berandau enggau pemesai Bomba alai sida minta penemu sentang konsep baru tu.

Salin, 57, sama bela ba Rh Collin ngemata sereta berandauka konsep baru rumah panjai ti diasaika likun.

Salin enggau bala anakbiak pechaya enti sida deka nirika rumah panjai 34 bilik ungkup 200 iku, pengawa nya meseti diperambu enggau manah.

Law (tengah) begulai enggau Collin (kiba) sereta salin berandauka sentang isu wayar lektrik.
Ari kiba – Law, Collin, Salin, Ketuai Stesyen Bomba Lopeng Terry Robson enggau siku peranak Rh Collin.

Entara isu ke dirandau iya ba sentang pengawa ngaga sambung wayar lektrik ke betul, dinding pemagi, pintu penama enggau pansut, bengkah perengka dikena nirika rumah, pelin ke dikemendar perintah negeri enggau Bomba, perengka madam api sereta insuran.

“Tembu randau, kami mutus nirika rumah panjai nitihka pelin kami empu. Tang kami tetap deka mendingka penemu ari Bomba ba sentang dinding pemagi ba tetiap dua tauka tiga bilik.

“Kami minta lun berumah ari HDC, puji tuhan pinta nya udah dikemendar. Kami empu deka meli perengka berumah lalu enda ngarapka kuntrektor tauka piak ketiga,” ku Salin.

Pekara ke pemadu berat tambah Salin iya nya ba sentang pengelikun, belanja ngaga rumah ulih ditangkup kami semua lalu pelin rumah panjai meseti disetuju semua.

Ba sentang atur nyeliah penusah angus, Salin madah sida sekayu rumah udah setuju diak dapur deka diserara ari bilik besai tauka rumah panjai.

Enti orang bisi nanya kebuah komuniti tu mengkang deka idup ba rumah panjai enti dibandingka enggau rumah nyembuah, sautnya ketegal sida udah teleba idup begulai dalam komuniti alai pengidup sigi enda kala sunyi. — DayakDaily