SBC diansak meratka pengawa pansik ba pengeraja asal kampung ngambi ulih digaga nyadi produk komersyel tinggi

Wilson (dua kanan) nyuaka setipikit Sempekat Bekunsi Pemaik ngagai Ketuai Komuniti Pa'Ukat Bario, Bujang Long ba pengawa ke diatur di Kuching seharitu.

Chris Bishop

KUCHING, Mac 20: Bengkah ekonomi biodiversiti bisi potensyel nyaup ngerembaika ekonomi Negeri Sarawak, ku Chairman Kaunsil Biodiversiti Sarawak (SBC) Tan Sri Wilson Baya Dandot.

Ku iya, pansik ba sentang utai tumbuh dalam kampung di negeri tu meseti chakah agi diadu alai SBC nengah sukung ari Perintah Negeri keran deka ngemansang ekonomi biodiversiti.

“Kitai udah nemu bengkah ekonomi betanam betupi, baka ke pengawa nanam sawit, padi, getah sereta komoditi bukai.

“Kitai mega nemu pengawa industri baka ke di Samalaju, semua industri besai bisi ba palan nya.

“Bengkah ekonomi biodiversiti tu bedau nyengala dipeda kitai tang nengah pengelandik raban SBC enggau saup ari Perintah Negeri aku pechaya kitai ulih ngemansangka ekonomi tu,” ku iya.

Wilson mansutka jaku nya rambau pengawa nyain Sempekat Bekunsi Pemaik Projek Litsara ke diatur di SBC, Jalai Puncak Borneo seharitu.

Sempekat nya matak lima komuniti bansa asal iya nya komuniti Pa’ Ukat sereta Pa’ Lungan Kelabit di Bario, Komuniti Lun Bawang di Long Kerebangan enggau Long Telingan, Lawas sereta Komuniti Bidayuh di Kampung Kiding, Padawan.

Ba pengawa nya, Wilson ngelalau raban SBC meratka pengawa pansik ba sentang pengeraja asal biologi ngambi ulih mansutka produk ti ngembuan rega komersyel tinggi.

Wilson (baris mua, tengah) begambar bebala mayuh enggau raban kaunsil SBC sereta ketuai Komuniti ari lima bengkah kandang menua di Kuching kemari.

Ngenang kaul ke sama, Wilson madah sempekat ke disetuju nya deka meri peluang sosio ekonomi tambah sereta ngangkatka penatai pemisi enggau ikas pengidup komuniti.

“Tu seraris enggau juluk Perintah Sarawak ti deka ngalih ngagai industri tradisyenal, lalu nguji ngemansang ekonomi alternatif bekenaka pemansang teknologi enggau sains maya ke diatu.

“Nengah chara tu kitai ulih beambi ulih ari pemesai tanah Sarawak ti kaya enggau pengeraja asal,” ku iya.

Dulu agi ari nya, Ketuai Pemesai Eksekutif (CEO) SBC Dr Yeo Tiong Chia ba jaku pengelalu madah penau tradisyenal enggau pansik ‘ethnobotanikal’ ngembuan kaul ke rat.

Ku iya, pengawa nya nempa peluang baru ba industri ‘wellness’ alai industri ‘wellness’ dunya diatu manggai USD3.7 juta trilliun iya nya tiga kali lipat berega ari industri ‘pharmaceutical’.

“Pemesai rega tu nyadika kebuah Sarawak keran ngintu pengeraja asal ke dikembuan,” ku iya.

Ba pengawa kemari, utai tumbuh ‘Medang Pawas’ ke udah diproses nyadi produk sabun, shampoo, pewangi bisi dipandang ngagai temuai ke datai.

Medang Pawas ditelah nengah mana Pahkak ba bansa Bidayuh enggau Tenem ba jaku Kelabit. — DayakDaily