Sarawak ningkilka leka sebut ‘negeri’ ba semua surat rasmi berengkah diatu

Datuk Abdul Karim Rahman Hamzah

KUCHING, Mac 17: Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah Sarawak ningkilka leka sebut ‘negeri’ ba semua surat rasmi berengkah diatu.

Ku iya, pemutus nya digaga bepelasarka perambu ngaga ubah ba Genteran 1(2) Konstitusyen Federal.

“Ketegal bisi ubah ba Konstitusyen Federal-Genteran 1(2) enggau tuju ngemetul status Sarawak dibandingka negeri bukai, Sarawak ningkilka leka sebut ‘negeri’ ba surat rasmi enggau jaku tangkan ke dikeluar.

“Leka sebut ‘negeri’ enda dikena agi, pekara tu dikena mida Sarawak enggau negeri bukai.

“Atur tu diterit berengkah diatu,” ku Abdul Karim ngagai DayakDaily pagi kemari.

Iya nambah, isu nya dirandau rambau penemuai Kepala Menteri Datuk Patinggi Abang Johari Tun Openg ke Betong kena 12 Mac tu tadi, alai iya bisi ngulu Aum Komiti Kordinasyen Pemansang Sarawak.

Aum nya bela digulu Sekretari Perintah Negeri Tan Sri Mohd Morshidi Abdul Ghani.

Abdul karim madah, tajapan ubah nya bedau dikemendar ba parlimen ke benung ngadu aum diatu, pengeran Perintah Federal mulaika status Sarawak enggau Sabah seikas enggau Semenanjung Malaysia sigi udah disetuju.

“Reti nya, ningkilka leka sebut ‘negeri’ ba surat rasmi sebengkah atur ke disetuju dalam Perintah Sarawak. Tu mungkur tusun merintah Sarawak, kitai nibuh nganti ubah nya dikemendar.

“Idea tu dikena mida Sarawak enggau negeri bukai,’tandu Abdul Karim.— DayakDaily