Chris Bishop
KUCHING, Mac 17: Gerempung Punan Nasional (PNA) mantah asil pansik ke dikeluar seraban lecturer ari tiga bengkah universiti ba sentang jaku bansa Punan.
Presiden PNA Daniel Batin madah keretas jurai “Bahasa Punan Bah: Satu Rintisan Awalan” enda digaga enggau silik sereta penerang ke ditulis sentang jaku bansa Punan salah.
“Kitai ngelaluka raban lecturer ngaga pansik sentang bansa Punan ketegal enda mayuh asil pansik sentang sejarah bansa tu dirikut enti dibanding enggau bansa bukai.
“Kitai mega nyadang raban lecturer ari universiti tu mantaika asil pansik ke bekualiti ketegal semua projek pemansik tu nguna duit ari asil chukai ke dibayar rayat.
“Tang sekeda enda, lalu tu ngasuh ati kitai ensiban. Keretas jurai “Bahasa Punan Bah: Satu Rintisan Awalan” enda nusuika jaku ke endar bansa Punan,” ku Daniel ngagai DayakDaily seharitu.
Nitihka penerang penulis keretas jurai nya ku Daniel nambah, pansik digaga ba komuniti Penan ke diau di Batu 12 di Bintulu.
Ku iya, kami ngelala sereta nelah komuniti nya ‘Penan Batu 12’ alai sida bejaku bahasa Penan.
Komuniti diak (Penan Batu 12) ku Daniel bejaku bahasa lokal ‘vaie segaan’.
Ketegal nya sekeda leka jaku ke ditulis ba keretas jurai nya ngundan leka sebut ‘vaie segaan’, Penan sereta Punan.
Iya madah bansa Punan asal tauka diau di sepemanjai Sungai ke dikumbai Sungai Punan iya nya urung 80km tunga selatan Bintulu.
“Punan diau jauh ari etnik Penan alai kami mega bejaku bahasa ke bebida sereta ngemeranka daya idup ke bebida,” ku Daniel.
Sejarah ku iya ngayanka nadai bansa Punan diau di Batu 12 Bintulu.
Nitihka penerang Daniel bansa Punan bisi di Pandan, Bintulu ke dikumbai ‘Punan Pedan’.
“Siti rumah panjai Punan urung 3 batu nuju Jelalong pengudah rumah panjai Kayan, Uma Lasa, komuniti tu dikumbai ‘Punan Jelalong’ tauka Rumah Hassan di Lo’O Buang.
“Komuniti Punan ke pemadu besai bisi di Kakus enggau Sungai Rejang,” ku Daniel.
Berindik enggau nya, iya minta raban lecturer ari Universiti Malaysia Sarawak (Unimas), Universiti Malaysia Sabah(UMS) enggau Universiti Kebangsaan Malaysia (UKM) ngemetul asil pansik ke ditulis ba keretas jurai nya.
Enti enda pia ku Daniel, keretas jurai nya tau nguingka runding sereta salah ari sukut akedemik.
Keretas jurai “Bahasa Punan Bah: Satu Rintisan Awalan” ditulis asil pansik Assoc. Prof Dr Saidatul Nornis Mahali, Remmy Gedat enggau Chong Shin. — DayakDaily
