Asadia negika main asal Dayak

Kelas betaboh 2018 dikerembai ba Batu 10, Kota Padawan.

KUCHING, Dis 24: Kenyau ditumbuh ba taun 2014, Akedemi Serakup Dayak Iban Sarawak (Asadia) majak tebilang sereta udah nempa orang ke landik ba main asal enggau leka main Dayak.

Enda ngadang akedemi ti nyendia kelas main asal nya tau nerima timbal ke manah, Ketuai Asadia Mambong Unggang madah penaluk deka ngenanka main asal Dayak nyadika semengat ngemujur juluk nya.

“Keterubah ngepunka Asadia, asai ati enda berapa pechaya ulih tejapaika juluk tang diatu pengudah empat taun ditumbuh, akademi majak dikelala,” ku Mambong.

Dirandau DayakDaily bedau lama tu tadi, Mambong, 51, ke mega siku pengajar di SMK Wira Penrissen madah berasai tepantup ati enggau pemujur ke udah ditempa Asadia.

Enggai ngetu ba ikas nya aja, Asadia ku iya deka majakka pengawa matih peranak Sarawak ba main asal Dayak nyengkaum ba leka main Dayak.

Pengeran numbuhka Asadia bepun ari penaluk iya ke main asal Dayak alai Mambong ngasai main asal nya meseti diintu enggau manah.

Nerima sukung ari Presiden SADIA Sidi Munan enggau Sekretari Besai Sadia Nicholas Mujah, Asadia ditumbuh ba bulan Mac 2014.

Raban Asadia ti mandangka ajat Iban, Bidayuh enggau Orang Ulu di Eastern Mall, Siburan.

Tuju Asadia

Asadia ke ditumbuh ba taun 2014 berengkah nyendia kelas ajat Iban ngagai peranak ke diau ngelingi Mengeri Kuching.

Dalam timpuh nya nyentuk ngagai diatu, mayuh bengkah main asal sereta leka main nyengkaum ari bansa Bidayuh enggau Orang Ulu udah diajar.

“Tuju kitai numbuhka Asadia iya nya deka ngangkatka main asal Dayak lalu nentuka main asal tu mengkang dipeda, dipandang sereta diintu enggau manah.

“Kitai matih sida ke bisi pengerindu ba main asal ngambika sida ulih nyadi peturun tauka orang ke landik ba main asal kitai Dayak,” ku iya.

Asadia dalam timpuh empat taun tu ku Mambong udah ngajar lebih 1,000 iku orang ari genap renggat umur baikka nya lelaki tauka orang indu di serata Sarawak ke diau di Mengeri Kuching.

Sekeda ari main asal ke bisi diajar kelimpah ari ajat Iban, Bidayuh enggau Orang Ulu iya nya kuntau, nebah sape, berenung, bepantun, begendang sereta mega nusuk marek enggau ngaga perengka ngepan.

Mambong (duduk empat kiba) begambar bebala mayuh enggau raban pematih kelas gendang pampat ke diatur di indu Opis SADIA di Kota Sentosa, Kuching.

Kelas Asadia

Naka ke diatu, Asadia nyendia kelas baikka nya kelas ngajat, sape, kuntau enggau main asal bukai dua kali setaun.

Tetiap kelas ku Mambong nitihka konsep tusyen lalu diatur dalam timpuh 2 bulan iya nya seminggu 2 iti kelas pengelama 2 jam.

Puku rata bayar ditetapka RM55 sebulan alai bayar nya dikena ngaji pengajar ke landik ba tetiap bengkah main asal.

Ungkup kelas ngajat Asadia, Mambong madah kelas nya udah diatur 10 renggat dalam timpuh 4 taun tu lalu kelas sape udah manggai 6 renggat.

Ku iya, raban pematih nya mega udah dikangau mandangka pengelandik ngajat di mayuh bengkah pengerami besai ke diatur di Kuching.

‘Ba sape, Asadia nerima mayuh pinta ari orang ti deka belajar pengelandik nebah sape.

“Asadia mega udah nempa raban nembiak ke landik nebah sape baka ke Howard Deri.

“Pengelandik Howard ba sape ngujungka iya dikangau ngerichah panggau Rainforest World Muzik Festival (RWMF) di Santubong sereta mandangka tebah sape di menua luar,” ku iya.

Ba sentang kelas betabuh ke diajar John Nuga, Mambong madah kelas nya diatu udah nempa 60 iku orang biak sereta tuai ke landik betabuh alai sida mega bisi belajarka tabuh kuntau.

Palan ngajar

Palan ngajar tauka kelas Asadia keterubah dibuka di Indu opis SADIA di Kota Sentosa.

Ketegal ti kurang belanja nyuwa palan ke manah sereta besai, SADIA meri awak ngagai Asadia ngaga kelas main asal ba opis nya.

Diak, kelas ngajat Iban Asadia keterubah udah diajar lalu ketegal mayuh pinta ari mensia mayuh kelas nya dikerembai ba Eastern Mall di Siburan ti nyadi palan kedua.

Palan ketiga dibuka di balai mayuh guna Batu Gong, keempat di Landeh alai kelima dibuka di Palan Zumba, Kota Padawan.

Mussen(duduk empat kanan) begambar begulai enggau Kelab Kuntau Asadia.

Program ‘Outreach’

Kelimpah nyendia kelas, Asadia meg bisi ngadu program ‘outreach’ alai program nya keterubah iya bisi diadu di Kem Muara Tuang (10 Renjer) ba taun 2016.

Ba program nya Asadia matih seraban soldadu sentang chara malu gendang pampat.

Nangkanka nya, Asadia ba taun 2018 tu bisi ke Kampung Sampun di Asajaya alai sida ngaga kelas ngajat enggau betabuh.

Juluk Asadia

Seraris enggau penaluk Mambong ba main asal bansa Dayak, iya ngarap raban pematih ari Asadia ngerembaika pengelandik sida ba pelilih bukai.

Ku iya, sida diperansang numbuhka kelas main asal alai pengawa nya ukai semina nyaup ngangkatka main asal Dayak tang mega tau nambah penatai pemisi.

Jaku puji

Ba pengujung randau, Mambong ngenataika puji ngagai raban ketuai ke udah mantu Asadia ngelamatu alai bantu sida nya ku iya udah nyaup ngemujur semua kelas enggau program ke diatur.

Iya meri puji ngagai sida ke udah meri bantu ari sukut wang ringgit sereta bantu bukai baka ke Sapit Kepala Menteri Datuk Amar Douglas Uggah, Menteri Muda Nembiak enggau Lumba Datuk Snowdan Lawan, Menteri Muda Pengangkut Datuk Dr Jerip Susil, Menteri Muda Pemansang Industri Malcom Mussen, ADUN Batu Kitang Lo Khere Chiang, Datuk Joseph Salang enggau Left General(Rtd) Datuk Stephen Mundaw. — DayakDaily