Tusun Ke 2 — Karam di Darat, penusah ke majak nyadi sereta balat ngirau

Api makai Rumah Panjai Langat Anthony Collin di Tinjar, Baram kena 31 Januari 2018 ti ngujungka 70 iku mansa nadai endur diau agi.

“This article is a translation of Longhouse fires in Sarawak, a growing concern – Part 2 originally published on December 19, 2018.”

Translation by Chris Bishop

BA TUSUN keterubah kenang “Karam di Darat, penusah ke majak nyadi sereta balat ngirau”, DayakDaily nusuika penyampau kes angus ke nyadi dalam timpuh tiga taun sereta pemerinsa ke diasai mansa.

Ba tusun ke dua tu, DayakDaily nusuika randau ke udah diatur enggau sekeda pemesai ‘senior’ ari Opis Bomba.

Randau diatur enggau tuju ngulihka penemu sereta chara ke tau dikena nyeliah penusah angus nyadi.

Idea sereta chara nyeliah

Rumah panjai di Sarawak enda diperabung Ordinan Begunan Sarawak (SBO) tauka penetap begunan ke bukai. Ketegal nya Tuai Rumah ulih nirika rumah panjai nitihka peneka sida sekayu rumah seagi didiri ba tanah NCR sida.

Berindik enggau nya, DayakDaily dipadah diak chukup berat siti “standard operation procedure” (SOP) meseti dituku ba tetiap pengawa nirika rumah panjai di serata negeri.

SOP nya meseti mega mungkur spesifikasyen pengelikun enggau pelin, kelebih agi ba penetap nyeliah penusah angus.

Dikena nemujur juluk tu, tetiap struktur rumah panjai baikka nya ke lama tauka ke baru meseti diadu manah. Reti nya disengkaum nitihka penetap SBO sereta dirijista ba Opis Pelilih Menua (DO).

Ungkup pengawa nirika rumah panjai baru, pelin meseti digaga orang ke ngembuan setipikit tauka arkitek. Pelin nya mega meseti dianjung ngagai DO sereta Bomba ngambi tau dipansik lalu ngulihka pemendar.

Bomba patut disengkaum dalam tim, iya nya raban ke ngaga pelin ketegal sida (Bomba) ulih meri penemu sentang chara nyeliah penusah angus.

Sigi diperansang diak tetiap bilik meseti bisi siti perengka madam api lalu tetiap rumah panjai mega diperambu digaga enda lebih ari 10 bilik. Kebuah pia, enti nyadi penusah angus, pengerugi enda mayuh.

Enti komuniti rumah panjai besai iya nya lebih ari 10 bilik, meseti digaga dinding pengenan api entara bilik ngambika api enda nyerarai enggau lengkas nuju bilik sepiak.

Ambika chunto enti rumah panjai bisi 20 bilik, meseti bisi sistem ngerak baka ke ‘smoke detectors’ enggau paip ai ke udah sedia disambung ngagai bekal ai baikka nya ari pegung, ai graviti tauka ari pam ai.

Enti rumah panjai lebih ari 30 bilik, semua ke disebut diatas nyengkaum perengka madam api meseti disedia.

Tetiap rumah panjai mega ku pemesai Bomba ‘senior’ meseti numbuhka siti tim iya nya raban orang ke dilatih madam api baka ke Bomba Komuniti, Emergency Response Team (ERT) tauka Gerempung Bomba Sukarela.

Tim tu deka datai enggau lengkas ba palan penusah ketegal sida udah dilatih lalu nyaup nyeliah api nyerarai. Sida mega dilatih nyelamatka mansa maya nganti Bomba datai.

Siti agi pekara berat, Kompeni Merinyu Electric ari opis Menteri Utiliti enggau Sarawak Energy Bhd patut diasuh meresa semua sambung wayar lektrik enggau perengka lektrik lalu nentuka pengelikun.

Pengudah diberi pemendar, semua otoriti ke bekaul patut meresa sekali agi alai pengawa ke sama tu meseti digaga ninting taun.

Ungkup rumah panjai ke udah lama didiri, pengudah disengkaum dalam penetap SBO, sida meseti ngemeranka chara nyeliah penusah angus baka ke udah diterang.

Rumah panjai 40 bilik Uma Bakung di Sungai Asap angus kena 19 November, 2018.

Ketegal tebal agi rumah panjai didiri bekena kereban kayu, siti idea ke ulih dikena nyeliah penusah angus iya nya malut kereban kayu enggau kereban ke enda mudah diempa api tauka dicat nguna cat ke enda mudah diempa api.

Chara tu mar tang enda mai pengerugi ketegal pendiau asal rumah panjai mengkang ulih dinan.

Rumah panjai pesaka asal ke berega Sarawak lalu ketegal nya meseti dinan ngambika mengkang dipeda. Rumah tu udah nyadi identiti bansa Dayak, Perintah Negeri patut meratka pengawa ngenan pesaka asal tu nengah teknologi moden.

Enti semua kitai ngembuan juluk ke sama, diak rumah panjai disengkaum dalam perabung SBO lalu diteritka enggau sah, kitai engka ulih ngintu sereta ngenanka pesaka asal tu ari diempa api.

Munyika genteran jaku “Enti bisi pengeran, udah tentu bisi jalai”. — DayakDaily

Antika Tusun Ketiga udah tu