Dikarang Chris Bishop
KUCHING, 10 SEPTEMBER: Pemerani bala sedadu Iban lebuh ngetanka menua ari ti dilanggar munsuh sigi nadai betatak.
Nitihka penerang pemansik enggau penulis ari Fakulti Sains Sosial dan Kemanusiaan, Universiti Malaysia Sarawak Profesor Madya Dr Neilson Ilan Mersat, kelimpah ari ti berani sida mega ngembuan ati ti kempang.
Ku Neilson, tu endang senutuk enggau pejuluk orang Panggau baka Keling ke disemaka orang Keling Gerasi Nading Bujang Berani Kempang.
“Semengat bakatu meh ti endang dipinta sereta dikedekaka menua baka Malaysia,” ku Neilson madah ngagai DayakDaily.
Tambah Neilson, pemerani dua iku sedadu Iban ti sama udah bulih Pingat Gagah Berani (PGB) iya nya Major (B) Michael Riman enggau Sarjan (B) Dajai Anak Anggie endang tau nyadika chuan nyadika teladan bala rayat Malaysia.
Major(B) Micheal enggau Sarjan(B) Dajai udah mandangka pemerani lebuh ngetankan menua ari dilanggar bala munsuh komunis ba taun 1970-an menya.
“Seduai sama becherita bakani ko pemedis sida belaban enggau munsuh lebuh ti agi gawa nyadi renjer ba taun 1970-an menya.
“Taja pan alai seduai besatup nya ba menua ke jauh takah, tang munsuh sida sama iya nya bala komunis ti endang ngembuan juluk ti deka nudukka perintah komunis lalu megai menua kitai di Malaysia.
“Sarjan(B) Dajai betachah di RASCOM di Sarawak lalu Major(B) Michael Riman betempuh enggau munsuh di menua Perak,” ku Neilson.
Sarjan (B) Dajai Anak Anggie-Operasyen Rascom
Lebuh ti dirandau Neilson enggau penulis UNIMAS Dr Regina Garai, Sarjan(B) Dajai anak Anggie becherita bakani sida ulih ngalahka munsuh tajapan sida sebuat ti betubuh 17 iko udah dilikup lebih 20 iko munsuh dalam siti operasi di menua pegai RASCOM.
“Dulu agi ari nya sentry kami udah diserang munsuh. Lebuh maya nya kami ulih munuh 5 iko munsuh.
“Dipelabaka mayuh bala munsuh mega bakal laban bekau sida ke rari nya sigi nandaka sigi mayuh sida udah bakal.
“Bala komunis sigi nadai nyangka bala kami ulih idup udah bekau rumah alai kami dipeletupka komunis ngena bom lalu runtuh,” ku Sarjan(B) Dajai.
Ketegal ari ti beranai matak bala iya ba operasyen nya dia alai Sarjan(B) Dajai lalu diberi pangkat Panglima Gagah Berani (PGB).
Major (B) Michael Riman-Perang di Bukit Korbu, Perak
Siko agi penerima Pingat Gagah Berani, Major(B) Michael Riman mega nusui cherita sida ti betachah di Bukit Korbu, Perak.
“Laban ke ngena baju panjai sereta tebal, diak alai aku nadai tentu berasai lebuh peluru masuk tubuh udah ti dikena timbak munsuh.
“Enda lama udah nya baru ngasaika lengan kanan pedis sereta bisi darah pansut, leka peluru nyau mengkang ba tulang lengan,” ku iya.
Micheal nusui, sebedau nya iya baru udah nimbak siko indu komunis ti udah bakal ditimbak tang nguji deka narit senapang.
“Munsuh nya deka nimbak aku baru, tang seninjik endar aku dulu meda,” ku Michael.
Sama bisi enggau maya ngerikut cherita seduai iya nya Presiden Gerempung Veteran Soldadu Kor Renjer (PVTKR) Lt Colonel Mohamad Melintang.
Lt Colonel Mohamad Melintang udah ngepunka projek bup nya laban ngasaika peneleba enggau penusah ti udah ditengah sida.
Iya ngasai pekara nya patut dipekunsika enggau bala mayuh.
Bup nya deka ngundan mayuh cherita bala Bujang Berani soldadu Renjer lalu disadang tembu ba taun 2021.-DayakDaily
