Salcra udah mayar dividen RM1 biliun ari projek kebun sawit

Uggah (duduk, topi merah) ba pengawa miring nyerumba Pengawa Manggol Projek Skim Kebun Sawit Salcra di Sekuau.

Dikarang Chris Bishop

SIBU, Mei 16: Kaunsil Penyerakup enggau Pengintu Tanah Sarawak (Salcra) udah mayar dividen penyampau RM1.088 biliun ngagai penyereta skim kebun sawit.

Sapit Kepala Menteri ke mega Chairman Salcra Datuk Amar Douglas Uggah Embas madah bayar dividen nya nyangkal tuduh sekeda orang ti madah SALCRA nadai mai penguntung ngagai penyereta.

“Kenyau ditumbuh ba taun 1976, Salcra nyentukka diatu udah mayar dividen penyampau lebih RM1 biliun ngagai penyereta.

“Tu nyadika tuju Salcra ti deka ngemansang tanah rayat di menua pesisir,” ku iya ba penemuai kereja ba Rumah Joseph Serang, Skim Sekuau seharitu.

Dulu agi ari nya, Uggah ngemujur Pengawa Manggol Projek Skim Kebun Sawit Salcra di Sekuau ditu.

Ba pengerami nya mega, Uggah madah projek nyadi siti chara Perintah Gabungan Parti Sarawak(GPS) nambah pemisi peranak ke nguan menua pesisir.

“Nitihka jaku Tok Nan (kepala menteri ke dulu Pehin Sri Adenan Satem), orang suntuk, orang tusah bisi di menua pesisir.

“Lalu pia mega polisi ke dituku kepala menteri (Datuk Patinggi Abang Johari Tun Openg) ke diatu alai GPS deka nentuka ubah pemansang digaga ba kandang menua pesisir,”ku iya.

Uggah ke mega Menteri Betanam Betupi Moden, Tanah Adat enggau Pemansang Kandang Menua nambah Skim Sekuau nyadi palan keterubah Salcra ngerembaika dagang ba kandang tengan Sarawak.

Kelimpah ari nya ku iya, Salcra mega deka ngerembaika pengawa di Arip (Sibu) enggau di Wak (Pakan) sereta ba kandang menua pegai Otoriti Pemansang Ulu Rajang (URDA).

Uggah (tiga kiba) nerima tepa (tikai) ari Tr Joseph (tiga kanan). Bela dipeda (ari kiba) Dr Penguang enggau Roland.

Ngenang sentang Skim Sekuau, Uggah madah tanah NCR pemesai 800 hektar ke udah digazet nengah Seksyen 6 Kod Tanah Negeri(KTN) deka dikena ngepunka kereja numbuhka kebun sawit.

“Tang sebedau nya, Salcra udah dulu berandau sereta berunding enggau orang bempu tanah ditu. Asil randau nya sida setuju SALCRA ngemansangka tanah sida.

“Nambahka nya, sida ditu udah ngenataika pinta kenyau ari taun 2010 tang ketegal ti bisi napi sekeda penanggul, pinta nya semina dikemendar ba taun 2016,” ku iya.

Penyampau 440 iku peranak ari 29 buah rumah panjai ngelingi nyadi penyereta Projek Kebun Sawit Skim Sekuau.

Ngenang kaul ke sama, Uggah madah diatu Salcra udah ngeluarka lebih 15,000 surat pala tanah ngagai penyereta skim.

Diatu ku iya nambah, enda kurang 20,000 bedau dikeluar lalu deka diberi dalam timpuh ke semak pengudah disetuju raban direktor Salcra.

“Kami, bala direktor enggau ketuai Salcra udah ngadu aum lalu setuju diak surat pala tanah diberi pengudah 3 taun sawit ditanam.

“Semua tu ulih dikemujur ketegal diatu kitai udah bisi teknologi,” ku Uggah nandu.

Ba pengerami nya, Uggah bisi ngagihka RM20,000 enggau RM5,000 ngagai JKKK sereta Biro Wanita Rumah Joseph Serang.

Kelimpah ari nya iya mega ngagihka RM250,000 ari UNIFOR dikena ngaga Gerija St Gerard di Nanga Sekuau.

Bela datai Menteri Muda Tanah Adat Datuk Roland Sagah, Menteri Muda Opis Kaunsil Datu Dr Penguang Manggil, Kaban Parlimen Kapit Datuk Alexander Nanta Linggi enggau ex-Sapit Kepala Menteri Datuk Patinggi Alfred Jabu. — DayakDaily