Rayat Malaysia makai garam ngelui ari pematut

Salt. — DayakDaily.com file pic. // Photo: Pixabay

PUTRAJAYA, Mac 15: Puku rata penyampau garam ke diempa rayat Malaysia iya nya 7.15g sehari dibandingka enggau 5g sehari baka ke diperambu Gerempung Pengerai Sedunya (WHO), ku Menteri Pengerai Datuk Seri Dr S Subramaniam.

Ku iya, pansik ti dipejalaika Opis Menteri Pengerai ba taun 2015 mandangka raban ke berumur 18 tahun ke atas makai kelalu mayuh garam.

Ku iya, tu tau ngasuh sida sakit hipertensi tauka darah tinggi ke tau ngujungka penyakit tungkul ati enggau strok sereta ngujungka pemati.

Bejaku ngagai pemberita beserimbai enggau ‘Minggu Kesedaran Garam Sedunia 2018’, Dr Subramaniam madahka mayuh agi sida tu enda nemu diri makaikelalu mayuh garam ba diet ninting hari sida.

“Rayat patut ngubah chara makai garam sereta ngemeran gaya pengidup ke bepengerai. Bisi pematut ngurangka nya dikena nentuka pengerai sida,” ku iya.


Ku iya, 20 bansa pemakai ke suah diempa ti ngembuan penyampau garam ke mayuh baka kichap lela, asi guring, telur dadar, asi lemak, kichap pekat, roti canai, sup dagin, sos tiram, mee bungkus, sos chani/tomato, sambal belachan, budu, ikan masin, stok perisa, pemakai lempung, pemakai dalam tin enggau pemakai ke diproses.

“Maya kitai makai di rumah tauka di restoran, meseti bisi butul kichap di atas mija. Ketebal udah teleba orang deka nambah kichap ba pemakai sida. Aku minta semua rayat Malaysia ngurangka garam ngagai 5g sehari tauka kurang ari 1 paras sudu teh sehari.”

Dalam minggu ‘Kesedaran Garam Sedunia’ ti disambut pengelama seminggu berengkah ari 12 Mac berambaika jaku “5 Capai 5 Gram Garam” ku iya, batang pesan nya ngelalau mensia mayuh pasal makai garam ke kelalu mayuh tau ngenataika oenusah ngagai pengerai, lalu diperambu 5 chara dikena nyeliah pekara nya.

Chara nya baka milih pemakai ti manahka pengerai, bacha sereta bandingka label sebedau meli pemakai, bererenggat ngurangka garam dalam resipi ti dikerindu, sliahka garam, kichap enggau sos ari pemakai lalu silih garam ngena rempah enggau perisa asal maya nyumai enggau nambah perisa. — DayakDaily