Penaluk soldadu semina ngagai raja enggau menua

Soldiers parachuting from an aircraft. — DayakDaily file pic. // Photo: Pixabay

KUCHING, April 10: Penaluk soldadu Angkatan Tentera Malaysia (ATM) diberi ngagai raja enggau menua lalu ukai ngagai sesebuah parti politik, pia ku Ketuai Soldadu Tan Sri Raja Mohd Afdandi Raja Mohamed Noor.

Ku iya baru, penaluk pemesai ATM ngagai raja enggau menua nadai tatak, nya kebuah sida semampai sedia gawaka rakyat enggau perintah ke megai menua.

Endang udah ba ati pemesai soldadu nyengkaum raban veteran kenyau sida ada nyentuk ke mati, penaluk sida ngagai raja enggau menua nadai kala luya.

Tu dipandangka nengah pengawa ke dikereja sida ke alai sida sanggup mati ke menua, ku iya madah ba aum pemberita beserimbai enggau ‘Program Jelajah Perkasa Perwira’ ke diatur ba Indu Opis 1st Infantri, Kem Muara Tuang ditu kemari.

Program nya bela digulu Kepala Menteri Sarawak Datuk Patinggi Abang Johari Tun Openg, Menteri Ngenanka Menua Datuk Seri Hishammuddin Hussin enggau Komander Mejar Jeneral Infrantri 1st Divisyen Datuk Stephen Mundaw.


Berebak enggau nya Hishammuddin ngelalau sekeda parti politik anang nanyaka penaluk soldasu laban sida endang beratka pengelikun menua.

Anang nguji ngemelika raban soldadu lalu anang nguji melitik orang bukai (raban soldadu semina ngeringka sebuah parti) laban nya ukai pekara ke manah.

“Chukup meh, laban sigi tatak kitai ngulihka sukung ba politik, ku iya. — DayakDaily

Share this article!