Julaihi, Annuar, Abdul Rahman enggau Abdul Karim dipilih nyadi Mandal Presiden PBB

From left: Abdul Karim, Dr Abdul Rahman, Julaihi and Dr Annuar celebrate their victory after the announcement at BCCK, Kuching.

KUCHING, Feb 11: ADUN Simunjan ke mega Menteri Muda Jalai Pesisir Datuk Julaihi Narawi menang penuduk mandal presiden Parti Pesaka Bumiputera Bersatu (PBB) ba Gempuru Besai PBB Ke- 14 di Kuching kemari.

Kelimpah Julaihi, ADUN Asajaya ke mega Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah bela menang penuduk ke sama ke diungkup ngagai sayap Bumiputera.

Dua penuduk bukai pulai ngagai Adun Nangka ke mega Menteri Muda Pelajar Annuar Rapaee enggau Adun Pantai Damai ke mega Menteri Muda Bekal Lekterik Dr Abdul Rahman Junaidi.

Ba pengawa bepilih nya, Julaihi bulih undi pemadu mayuh iya nya 770 undi, Annuar 764 undi, Abdul Rahman 719 undi lalu Abdul Karim 698 undi.

Tujuh ketuai PBB ari sayap Bumiputera bepekit ngerebut 4 penuduk mandal presiden.


Tiga ketuai ke alah iya nya Adun Bukit Kota ke mega Menteri Muda Betanam Betupi Dr Abdul Rahman Ismail (585 undi), Adun Belawai ke mega Menteri Muda Pemamsang Kandang Mengeri, Tanah enggau Rampa Menua Datu Len Talif Salleh (481) enggau Adun Jepak ke mega Menteri Integriti enggau Ombudsmen Datuk Talib Zulpilip(329 undi). — DayakDaily