Komiti Renggat Tinggi Perintah Besai, Nengeri deka ngiga chara kuasa dipulai ngagai S’wak

Datuk Seri Najib Tun Razak

KUCHING, Feb 11: Komiti Renggat Tinggi entara Perintah Besai enggau Nengeri deka ngemujur pinta Sarawak ti dekaka kuasa ke patut nitihka Sempekat Malaysia 1963(MA63) diberi pulai.

Bejaku rambau Bejadi Gempuru Besai Parti PesaKa Bumiputera Bersatu (PBB) Ke 14 di Kuching, Menteri Besai Datuk Seri Najib Tun Razak madah pinta Sarawak sentang pekara nya enda nyadika penanggul.

“Perintah Besai deka mega numbuhka Komiti Renggat Tinggi ngambi ulih berandau enggau komiti ke sama ari Perintah Sarawak.

“Kededua komiti deka ngiga chara bakani kuasa tu ulih diberi pulai ngagai Sarawak,” ku iya.

Komiti Renggat Tinggi Perintah Sarawak diarika ketetiga Sapit Kepala Menteri iya nya Tan Sri James Masing, Datuk Amar Douglas Uggah enggau Datuk Amar Awang Tengah Ali Hasan.

Ba pengerami ke digulu urung 5,000 iku deligit ari 82 pampang PBB, Najib besemaya ngemujur pinta Sarawak.

“Enti kitai sengaja tauka enda sengaja ngambi kuasa enggau hak ke patut diempu Sarawak,aku sanggup mulaika kuasa nya.

“Kitai enda tau ngambi hak orang bukai ke alai kitai berakup dalam sebuah ruang bilik lalu mengkang ba serakup Malaysia,”ku iya.

Anang irau Abang Johari(Kepala Menteri), kitai berandau manah lalu ngiga chara ngemujur ke alai ba kabinet pan mayuh bala menteri ari Sarawak, tandu Najib. ā€” DayakDaily