KUCHING, Feb 12: Empat Naib Presiden Parti Pesaka Bumiputera Bersatu (PBB) Pampang Bumiputera ke udah menang ba pengawa bepilih kena Hari Enam nyin tadi, besemaya deka bejalaika tanggungpengawa ti udah dilempai ba sida.
Ba aum media kemari, sida mega besemaya nyukung iring Presiden PBB ke mega Kepala Menteri Datuk Patinggi Abang Johari Tun Openg ngemujurka agenda transformasi iya.
Ba pengawa bepilih maya Aum Besai Pengari PBB kena Hari Enam nyin tadi, Datuk Julaihi Narawi udah bulih 770 undi, Dr Annuar Rapaee, 764 undi, Dr Abdul Rahman Junaidi, 719 undi, lalu Datuk Abdul Karim Rahman Hamzah, bulih 698 undi.
Tiga chalun ke alah iya nya Datuk Talib Zulpilip, Datuk Len Talif enggau Dr Abdul Rahman Ismail.
Ungkup Pampang Pesaka, tiga ke dipilih enda betanding iya nya Datuk Seri Dr Stephen Rundi Utom, Datuk Roland Sagah enggau Datuk Gerawat Gala. — DayakDaily
