Ampuh bah ketiga kali nambahka penusah ba SK Rumah Keseng

Flooded road. — DayakDaily.com file pic. //Photo: Pixabay

TATAU, Feb 12: Ampuh bah ketiga kali dalam timpuh tiga bulan udah balat ngerusak perengkaguna sereta ngachau proses ngajar enggau belajar (PdP) sebuah sekula primari ti besemak enggau tebing Sungai Kakus, ditu.

Kepala Pengajar Sekolah Kebangsaan Rumah Keseng (SK Rumah Keseng), Tatau, Anthony Upon madahka sekula nya keterubah ampuh ujung bulan Disember taun siti nyin tadi, kedua kali pun bulan Januari lalu ketiga kali iya nya pun minggu tu tadi.

“Ba penusah ke pemadu baru ai niki nyauka tiga meter ngampuhka kandang sekula. Perengka sekula baka kerusi, mija abis rusak ngujungka proses PdP enda ulih dipejalaika enggau manah.

“Ampuh bah enggau peninggi tikas ai ukai semina ngaga pengerusak tang, asai aku baya pan udah tama ngagai kandang sekula,” ku iya lebuh dikerandau di sekula nya ensana.

Sekula nya ke sepenyauh urung sejam pejalai nepan perau ari Pasar Tatau beratika kandang sekula baka padang sekula, bilik kelas enggau bilik pengajar mengkang ampuh ketegal ai ke melema ari Sungai Kakus.

Ku Anthony, ketegal penusah ampuh bah ke pemadu baru nya,sida udah ngasuh 145 iku nembiak ari prasekula nyentuk Primari Enam pulai ke rumah diri ketegal berundingka pengelikun sida kenyau ari Hari Tiga tu tadi.

“Pemadu nyinuka ati iya nya pengerusak ketegal ampuh bah maya keterubah enggau kedua ti empai ulih diterima tauka dikemanah, sekula tu lalu napi penyadi ketiga. Aku ngarapka sida ke bekaul ulih jampat nyuaka bantu baka nganti bup teks enggau kerusi mija ke rusak,” ku iya.

Ku iya, taja pan bala nembiak dikemendarka berkata pulai tang sekula agi beroperasi ke alai 16 iku pengajar, semilan staf sukung begulai enggau peranak menua matau gaya ampuh bah nya. — DayakDaily