Cobbold: Baru Bian patut nanya Presiden sida

Cobbold John

KUCHING, Okt 18: Ulah Ketuai Parti Keadilan Rakyat (PKR) Sarawak ti besalah Parti Bansa Dayak Sarawak Baru (PBDSB) bekaul isu Hudud berupai amat ngembuan politik mejal, ku Presiden PBDSB Cobbold John.

Chairman PKR Sarawak Baru Bian ensanus nuduh Cobbold mansutka penerang ti nusutka runding rayat ti madah PKR nyukung PAS bekaul kontroversi undang-undang Hudud.

“Jaku ti dipansutka aku bepelasarka berita amat ti dipansutka New Strait Times kena ka February 10, 2017.

“Aku enda mansutka berita selebubu lalu pekara tu ditemu mensia mayuh,” ku Cobbold.

Nitihka penerang berita nya, penemu Datuk Seri Wan Azizah bendar amat disangkal bala DAP kelebih agi Datuk Zaid Ibrahim.


“Aku nadai penanggul enggau YB Baru. Kami duai endang lama udah begulai ari jeman PBDS suba lalu iya kala mangku pengawa nyadi Mandal Presiden.

“Kelimpah sama kala bediri nengah tikit MDC/SNAP taun 2006 suba,” ku Cobbold.

Ngenang kaul ke sama, Cobbold berasai tekenyit ketegal Baru bejaku nganu iya sereta ngumbai iya enda patut nyadi ketuai.

“Baru siku luyar tebilang lalu patut nemu siku orang enda tau dituduh salah enti empai diletakka salah.

“Nya alai, ba dunya politik pan sebaka, iya enda tau nganu aku, tang manah agi betanya ngagai presiden PKR ngenukuka pekara tu,” pia ku Cobbold.

Cobbold mega madah, PKR suah nuduh PBDS Baru tu kaban Barisan Nasional(BN) sereta orang keterubah mantah kenyau PBDS diidupka baru ngena nama PBDS Baru.

Cobbold mega madah, PBDS Baru enggau besai ati muka pintu ngagai Baru nyeretai sida.

Cobbold ngasai pedis amat YB Baru deka bejaku ka Dayak dalam PKR.

Ku Cobbold nambah, penemu iya manah tang enda meri empas ka besai laban iya bejaku ka PKR.

“Nya alai, iya patut berunding ka pekara tu enggau dalam agi,” ku Cobbold.

Share this article!