KOTA SAMARAHAN, Mei 14: Rakyat anang ilap enggau pengelikun ti diasaika diatu laban keruga pengelikun tau datai ari bemacham chara.
Panglima Medan Timur Tentera Darat Malaysia, Leftenan Jeneral Datuk Wira Mohd Zaki Mokhtar, madahka mensia mayuh patut nemu, ke alai munsuh semampai beratika gaya menua lalu sida tau ngaga penyarut enti raban pengelikun ilap.
Nya alai ku iya, semua orang patut semampai bekempit enggau raban pengelikun ngambika menua seruran likun.
“Ngetanka menua tanggungoengawa kitai semua, ukai semina dilempai ba raban penyaga pengelikun aja, tang semua ejensi perintah, peribit enggau rayat patut seruran beratika gaya nya belama.
“Kitai diatu ukai napi bemacham pemar ari siti chara tang mega tau datai datai ari bemacham sukut nengah chara ke bebida,” ku iya.
Mohd Zaki madah munyi nya ngagai media pengudah pengawa bebaris ngenatika pengaga ati ngagai iya ba Kem Muara Tuang, sehari tu tadi.
Iya ke mega Panglima keterubah Pemerintah Medan Timur Soldadu Darat ti ditumbuh kenyau empat taun ke udah, deka pinchin apus bulan tu.
Pemerintah Medan Timur Soldadu Darat mangku tanggungpengawa penuh nyaga pengelikun negeri Sabah enggau Sarawak ditumbuhka kena 1 Mac 2014.
Mohd Zaki madah, sekumbang empat taun nyadi ketuai Soldadu Darat nya, mayuh perambu digaga kena negapka pengelikun di negeri nya nyengkaum numbuhka 31 Briged Entara Menua ti negapka pengelikun ba garis entara menua Malaysia enggau Indonesia.
Ku iya baru, pengering Soldadu Darat Malaysia di negeri nya mega deka ditambah nengah pengawa numbuhka Divisyen Kelima Infantri ti bepalan di Sabah.
“Diatu, proses numbuhka Divisyen nya mengkang dipejalaika nengah nukleas Tim Pengereja Pengawa 450 lalu enti semua proses nya tembu, aku nyamin tikas pengelikun Sabah enggau Sarawak deka majak manah,” ku iya. — DayakDaily
