Semina berita ti tau ngeruga pengelikun menua aja deka ditinggang ukum

Tun Dr Mahathir Mohamad

KUALA LUMPUR, Mei 14: Tun Dr Mahathir Mohamad madahka perintah enda ninggang ukum ngagai sebarang ripot berita ti enda betul enti nya enda ngeruga pengelikun menua.

Ku Menteri Besai, nya ngambika pengemeran media menua nemu kediri empu nagi berita palesu enggau ke amat ke diripot sida.

“Ba rejim ke sebedau tu, kitai ditagang. Bisi surat kabar nyukung nyin, nyukung tu, tang kami enda nagang ripot sida, asalka bisi mai reti dalam ripot nya.

“Taja pia, uenti bisi pengawa ke deka ngaga penyarur nya enda ulih diterima,” ku iya lebuh ke meri penerang ngagai RTM enggau Bernama ba rumah iya ditu kemari.

Dr Mahathir mega madah, taja pan perintah baru ari baruh pegai Pakatan Harapan nadai nagang ba berita, tang nya mega bisi tatak.


“Enti sida sengaja ngaga ripot ti tau ngaga penyarut, kami napi nya ngena undang-undang khas,” ku iya nyemetak.

Menteri Besai mega madahka undang-undang sentang berita palesu deka diberi definisi baru sereta nyata agi ngambika mensia mayuh enggau kompeni ti ngeluar meretika pekara nya. — DayakDaily