KUCHING, April 5: Tim ‘Cantas’ Polis Diraja Malaysia (PDRM) ari baruh keara Opis Nasat Pengawa Jai (JSJ) negeri udah sedia napi sebarang penyadi ba sekeda endur ‘angat’ dikena nentuka pengawa bepilih besai lanchar dipejalaika.
Kepala Polis Menua, Tan Sri Mohamad Fuzi Harun madah naka ke diatu bisi 17 kandang endur angat ke udah dikelala lalu pengawa Tim Cantas iya nya nentu individu ke dijangka tau ngaga penyarut enda ngaga sebarang penyarut ke tau ngachau pengelikun maya PRU14 nya ila.
“Polis deka beratika belama palan angat nya lalu deka nambahka penyampau raban nyema bisi pematut.
“Di Sarawak, pengelikun agi ulih dijaga sereta dipelabaka penanggul berat maya pengawa bepilih laban di Sarawak semina bisi 32 sitak parlimen aja, enda baka di Sabah enggau Semenanjung ke mungkur Pengawa Bepilih Besai enggau Kunsil Negeri,” ku iya.
Ku Mohamad Fuzi, polis deka beratka pekara pengelikun sekumbang timpuh pengawa bepilih nya lalu atur ke terit deka diambi nyema bisi orang ti nguji ngaga penyarut sereta ngeruga pengelikun.
“Kami udab nyendiaka Tim Light Strike Force ( LST) ke chukup ngambika nyaga pengelikun lalu nyema bisi pematut Pasukan Gerakan Am (PGA) deka dikangau.
“Dikearapka penanggul pengelikun sekumbang timpuh pengawa bepilih nya ulih diputar seraya ngarapka nadai pekara ke enda manah bisi nyadi,” ku iya.
Tambah iya,ari 9,178 iku pegawai enggauraban, sepenyampau 7,017 deka gawa maya PRU14 lalu laluh nya deka gawa baka selama. — DayakDaily
