Tangguh dulu apil, kes kot tanah NCR — Salang

Julau MP Datuk Joseph Salang

JULAU, Nov 6: Kaban Parlimen Julau Datuk Joseph Salang Gandum meri langgur penemu ngambika perintah negeri Sarawak nangguh semua apil tauka kes kot bekaul enggau tanah Hak Adat Peribumi (NCR) ti benung nganti dipechara.

Iya minta kes kot nya enda diterus nyentuk ke ubah baru ba Undang-Undang Tanah Negeri bekaul tanah nya dikemendar ba Dewan Kunsil Negeri, dikarapka kena bulan Mei taun baru.

“Nya kelai penyiru perintah negeri ngagai pengempu tanah,” ku iya madah ngagai Bernama.

Salang mega madahka iya mantaika langgur penemu nya atas kapasiti iya nyadi Kaban Parlimen tauka pengari rayat, ukai sebagi ari kaban komiti negeri ke ditumbuh myarka mayuh isu berkaul tanah NCR.

Komiti nya betuaika Sapit Kepala Menteri Datuk Amar Douglas Uggah Embas, ke mega Menteri Betanam Betupi Moden, Tanah Adat enggau Pemansang Sarawak.


Ku Salang, isu baka definisi “pemakai menoa” (rizab komunal) enggau “pulau galau” (kandang menua ari baruh dikuasa ) mayuh bengkah komuniti asal nyengkaum Penan udah nyaruka perambu deka mgubah nya.

“Pekara nya ukai mudah baka ke dipikir kami ba maya keterubah. Pengudah interbiu sereta pansik dipejalaika Majlis Adat Istiadat Sarawak, kami beratika mayuh difinisi bekaul “pemakai menoa” enggau “pulau galau.”

“Komuniti bukai mega ngembuan penemu ke bebida. Mega bebida ba endur bukai taja pan dalam komuniti ke sama.

“Ambika banding, komuniti Iban ba menua baka Betong, Lubok Antu, Saribas, Julau tauka Kapit ngembuan definisi sida empu” ku Salang ke mega nyadi Sekretari Besai Parti Rakyat Sarawak (PRS).

Ku iya ke tuju ubah nya, patut bisi definisi standard lalu nya benung digaga komiti nya.

Ku iya baru, nadai pematut mega nuduh komiti nya enda bebendar sereta sengaja ngelubahka pekara nya. — DayakDaily

Share this article!