Taib Mahmud nampung pengawa nyadi TYT Sarawak

Yang di-Pertua Negeri Sarawak Tun Pehin Sri Abdul Taib Mahmud kemari nerima surat chiri nampung pengawa iya empat taun agi ari Yang di-Pertuan Agong Sultan Muhammad V di Istana Negara.

KUALA LUMPUR, Feb 8: Yang di-Pertua Negeri Sarawak Tun Pehin Sri Abdul Taib Mahmud kemari nerima surat chiri nampung pengawa iya empat taun agi ari Yang di-Pertuan Agong Sultan Muhammad V di Istana Negara, ditu.

Pengawa nyerahka Surat Chiri ngagai Yang di-Pertua Negeri Sarawak nya bela digulu Menteri Besai Datuk Seri Najib Tun Razak.

Kelimpah ari nya Kepala Menteri Sarawak Datuk Patinggi Abang Johari Tun Openg, Yang Dipertua Dewan Negara Datuk S A Vigneswaran enggau Ketuai Akim Menua Tun Md Raus Sharif sama bisi ngulu atur pengawa nya.

Tu penggal kedua Taib dichiri nyadi Yang Dipertua Negeri Sarawak.

Kena 1 Mac 2014, Abdul Taib udah ngangkat sumpah nyadi Yang di-Pertua Negeri Sarawak ketujuh pengudah ngetu nyadi Kepala Menteri Sarawak kena 28 Feb 2014.


Abdul Taib mangku pengawa nyadi kepala menteri pengelama 33 taun kenyau ari 26 Mac 1981, nganti aya iya Tun Abdul Rahman Ya’kub.

Iya kala gawa nyadi akim federal ba Kort Besai Australia Selatan pengudah nembuka pelajar dalam bidang undang-undang di University of Adelaide, sebedau mulaika diri ke Sarawak.

Abdul Taib masuk dalam bidang politik ba taun 1963 pengudah nyadi Kaban Kaunsil Undang – Undang Negeri Sarawak nyentuk taun 1966.

Iya mega kala dipadu nyadi menteri penyambung enggau kereja raya negeri sereta menteri pemansang enggau kampung negeri. — DayakDaily

Share this article!