Sungai Samadang tau endar dikemansang nyadi produk dagang temuai

People in boats paddle down a river. — DayakDaily.com file pic. // Photo: Pixabay

KUCHING: Sungai Semadang di Penrissen tau endar dikemansang nyadi produk enggau palan dagang temuai di Sarawak, ku Sekretari Mendam Opis Menteri Dagang Temuai, Art, Main Asal, Nembiak Lumba enggau Main Sarawak, Datuk Ik Pahon Joyik.

Ku iya, rampa ke manah di sepanjai Sungai Semadang (tunga ke ulu Sungai Sarawak Kiba), berengkah ari Kpg Annah Rais nyentuk ke Kpg Git balat ngemegahka ati sereta dikerindu temuai ari menua tasik.

“Sungai Semadang pesaka ke patut diintu kitai laban nya produk dagang temuai ke sigi asal udah bisi semina patut ditambah enggau mayuh bengkah aktiviti baka berakit enggau bekayak,” ku iya lebuh ke bejaku ba pengerami nutup enggau nyuaka perais Safari Rakit Padawan 2017 di Kpg Git ensana.

Ku iya baru, kandang menua Penrissen enggau Padawan sigi kaya enggau produk ekodagang temuai kelimpah bisi rumah panjai tradisional Kpg Benuk enggau Kpg Annah Rais ke nyadi pematak penatai temuai.

Nya kebuah ku iya, aktiviti Safari Rakit Padawan deka majak diatur lalu diperambu mega aktiviti main asal, art, lumba enggau main rayat sereta tradisional bela bisi diatur dikena ngintu main asal bansa bansa Bidayuh ba kandang menua nya.