BAU, Mac 14: Sarawak bisi potensi besai nyadi pengeluar nanas menua, lalu enggau Lembaga Perindustrian Nanas Malaysia (LPNM) ke nyadi indu ejensi ngemansangka industri nanas benung chakah ngelakuka utai tanam nya di negeri tu.
Sapit Menteri Industri Betanam Betupi enggau Bumai, Datuk Anthony Nogeh Gumbek madahka LPNM ti berengka beroperasi di negeri Sarawak ba taun 2010 udah meri bantu ngagai urung 600 iku penanam nenas di serata negeri tu nyentuk ke ujung taun 2017 nengah pemesai tanah 800 hektar.
Ku Nogeh, perintah udah ngelala bagi nenas nyadi siti ari pemansut pengaya baru enti dikemeranka enggau bebendar sereta penuh komitmen ti ulih meri penguntung ti manah.
“Nenas sebengkah utai tanam ke bisi potensi dimajukan nyadi penatai oemisi ti ulih meri penguntung,” ku iya lebuh bejaku ba pengerami nyerahka skim bantu nanam nenas LPNM di Kampung Stenggang ditu demalam.
Sepenyampau 10 pesereta nerima bantu nya beungkus RM5,500 siku nyengkaum bantu paung, rachun, baja enggau hormon.
Ku Nogeh baru, ungkup taun 2018 LPNM nagit nambahka kandang endur baru iya nya nambah ngagai 80 hektar di Sarawak.
Kelimpah nanam nenas Moris (Sarikei) enggau nenas N36 ti majak bisi peminta ke tinggi, LPNM benung ngelakuka nanam nenas premium MD2 ke tuju eksport laban nya bisi peminta ke tinggi ba makit dunya nyengkaum di China.
Ku iya, projek keterubah nanam nenas premium MD2 ba tanah pemesai lapan hektar udah dipejalaika ba Kampung Padang Pan, Bau sereta deka dikerembai ngagai endur bukai pengudah ngeluarka asil ila.
“Nengah potensi ke besai, Sarawak dipeda ulih mantu ngangkatka industri nenas menua lalu peluang nya patut direbut rayat negeri tu,” ku iya.
Ba pengerami nya Nogeh ke mega MP Mas Gading tbisi nyuaka bantu belanja ngagai lebih 100 iku indai tunggal enggau raban orang nyelai pendiau (OKU). — DayakDaily
