Nadai penanggul suntuk petrol, diesel di Lawas

Vehicle getting refueled at a petrol station. - DayakDaily.com file pic. // Photo: Pixabay

MIRI, Mac 14: Opis Menteri Dagang Dalam Negeri, Koperasi enggau Pekara Bebeli Barang (KPDNKK) ngenadaika bisi nyadi pengurang petrol enggau diesel di Lawas baka ti dikerembai ba media sosial beduduk ari pengawa nutup sebuah stesen minyak kemari.

Ketuai KPDNKK pampang Limbang Zakaria Awang madah, stesen minyak di Lawas nya ditutup pengempu nya laban bisi penyilap nyadi maya ngisi tangki minyak petrol RON95 di stesen nya kena Hari Minggu nyin tadi.

“Semasa proses ngisi, tangki petrol RON95 udah diisi enggau diesel lalu minyak nya udah bechampur ngujungka meri penusah ngagai penguna entukar ke ngisi minyak kena Hari Minggu nyin tadi” ku iya.

Zakaria madahka stesen minyak nya udah beroperasi baka selama sehari tu udah bekau minyak diesel mujur dikeluarka ari tangki petrol RON95 kemari lalu asil pansik pekara nya nya nyadi ketegal penyilap.

“Pengempu entukar ke rusak ketegal nya tau madah ngagai opis KPDNKK Lawas ngambika entukar sida dibiki laban pengempu stesen minyak nya madahka iya sedia mantu miki entukar sida nya,” ku iya. — DayakDaily