Rikut pejalai enggau pengaji ba otoriti, tesau Leon

Leon (bediri tiga ari kiba) nyuaka cek RM4,000 ari Chong ngagai Bangi.

KUCHING, Jun 26: Peranak rumah panjai ti deka kereja ba menua luar diperansang ngerikut pejalai sida ba Opis Imigresen.

Kelimpah ari nya, Chairman Parti Tindakan Demokratik (DAP) Sri Aman Leon Jimat Donald mega ngelalau sida ngerikut kompeni ke ngaji sida ba Opis Pengereja Pengawa.

“Tu ketegal mayuh udah nyadi kes nipu ba sentang pengawa puang ke dikerembai nengah media rama.

“Kes ke pemadu baru iya nya ba penusah 47 peranak Sarawak ti ditipu di menua Kemboja,” ku iya ba pengerami begulai enggau rayat di Nanga San, Sri Aman bedau lama tu tadi.

Leon nambah, ngerikut pejalai sereta kompeni pengaji nya berat ngambika enti bisi nyadi penusah ngenyit, otoriti ulih nemu endur sida diau lalu madah ngagai kaban belayan enggau lengkas.

Ambika chunto ba kes bebadi nyawa ku iya, suah mega pengaji enda nemu sapa bala kaban orang ke ditinggang penusah nya tajapan nengah Opis diplomat Malaysia.

“Siti agi kebuah iya nya ngambika Opis Pengereja Pengawa ulih nentuka sempekat entara pengaji enggau pengereja pengawa sah sereta enda ditipu.

“Tebal agi sida tu bansa Dayak ti ngereja pengawa berat tang ketegal gaji besai sida beguai nerima kereja nya.

“Sekeda enda ngerijister diri ba imigresen enggau opis pengereja pengawa,” ku Leon.

Maya napi penusah, sida enda nemu chara ngintu tauka ngelarika diri alai pekara tu chukup ngenyinu ketegal bala kaban belayan di menua enda nemu penusah sida, tandu Leon.

Ba program nya, Leon bisi nyuaka cek penyampau RM4,000 ngagai Biro Orang Indu Kpg Nanga San ke diterima Bangi Sami.

Bantu nya datai ari Sapit Menteri Dagang Dalam Menua enggau Pekara Bebeli Barang (KPDNHEP) Chong Chieng Jen. — DayakDaily