Renjer-Setumbit enda nginsit setempap enda rarat

Ari kiba: Lt Kolonel (B) Mohamad Melintang, Nicholas, Tr Bandi, Jepon, Neilson enggau Regina.

Dikarang Chris Bishop

KUCHING, 16 Sept: Pengelikun sereta pemaik menua ti diasaika semua rayat nyadika sebengkah pemeri ti chukup besai reti ari bala soldadu Iban.

Pemansik ari Fakulti Sains Sosial dan Kemanusiaan Universiti Malaysia Sarawak (Unimas) Profesor Madya Dr Neilson Ilan Mersat pechaya, ketegal ti bisi pengirau sereta penangi enggaika menua dilanggar munsuh, bala Iban bela sama angkat enggau orang bukai nyabung pemerani ngetanka menua.

“Tu meh siti ari pemeri ti chukup besai reti ari bala soldadu Iban ngagai perintah menua Sarawak enggau Malaysia.

“Pemeri ti dikumbai kitai pengelikun enggau pemaik menua,” ku iya bejaku ngagai DayakDaily.


Nusuika sejarah, Neilson madah penyarut ti nyadi baka di Brunei lebuh maya ‘Pemberontakan Brunei(1962)’ ti betuaika A.M Azahari sereta ditangkanka enggau konfrontasi Indonesia- Malaysia(1963) endang balat ngasuh ati rawan.

Ku iya, semua penusah enggau pemedis ba jeman nya udah ngeringka semengat sida deka nyadi soldadu ngetanka menua diri.

“Aku masuk nyadi renjer ba taun 1964 menya laban enda tan ati sereta enggai meda menua kitai tu dilanggar munsuh lalu betuaika perintah komunis,” ko Ex-Kpl Nicholas Isaac Rimbau ari Gua Dalam Sri Aman ti dikerandau Neilson bedau lama tu tadi.

Nicholas ngetu nyadi soldadu renjer ba taun 1984 alai iya mega nerangka bakani sida nerima latih ti terit ari soldadu orang putih lebuh ti belatih.

Tambah Neilson, ketegal ati amat kering deka ngetanka menua dia alai latih ti kasar diberi ngagai sida nadai ngasuh ngechul.

Siko agi raban renjer sama bisi nusui pengerawan ati lebuh ti bejalai dalam kampung maya ngiga munsuh iya nya Ex-Kpl Jepon Jayan ari Batu Besai Sri Aman.

“Anang ngumbai diri enda takut lebuh bejalai ngiga munsuh tang enti senapang udah meletup dia alai penakut nya nadai agi lalu kitai belabuh ngansingka pemerani,” ku iya lebuh ditanya kati asai ati lebuh menua agi angat ba taun 1960an ngagai taun 1970an menya.

Neilson mega bisi berandau enggau Ex-Sarjan Major Tuai Rumah Bandi ti madah diak lebuh maya belatih enggau soldadu orang putih, sida iya terit lalu nadai tau salah patah.

Ku Bandi, tu meh siti jalai sida ngasuh kitai nyadi soldadu ti manah.

“Kelimpah ari pemerani kami mega diuji orang pengelandik nyadi ‘jungle trekker’ ngiga munsuh.

“Mayuh jalai sida nguji nuan lalu enti nuan landik sida lalu ngambi nuan nyadi rekrut” ku Bandi ti masuk nyadi soldadu ba taun 1961.

Bandi ke asal ari Selepong Kunang Sri Aman udah dilatih soldadu British di menua Hongkong enggau di United Kingdom kelimpah ari ti bisi nerima latih di menua kitai empu.

Iya pinchin ba taun 1984.

Ku Neilson nambah, kelimpah ari ti ngembuan pemerani ketetiga sida tu endang bisi peneleba enggau pengelandik lebuh ti bejalaika pengawa nyadi soldadu renjer menya.

Ku iya, sida nyabung pemerani berambunka nyawa lalu seruran ingatka jaku peransang sida “Agi Idup Agi Ngelaban”.

“Pengingat enggau cherita pengidup sida tau nyadika teladan enggau chuan sereta malin nembiak rebak baru awakka ngembuan semangat ke tegap belama lebuh ngetanka menua,” ku iya.

Ketegal sejarah enggau cherita pemerani nya ku Neilson, peneleba enggau penanggul ti ditapi sida deka dipasukka dalam bup awakka bisi dibacha sereta nyadi pengingat orang mayuh jemah ila.

Sida tiga tu bekunsika cherita enggau Neilson sereta Dr Regina Garai di Lachau beserimbai enggau pengawa gempuru sambil meri penerang ngagai bala kaban renjer di pasar Lachau Sri Aman kena Hari Tiga tu tadi.

Gempurunya diatur Gerempung Veteran Soldadu Kor Ranger (PVTKR) begulai enggau Jabatan Hal Ehwal Veteran Sarawak.

Siti ari tuju gempuru iya nya dikena meri penerang ngagai bala kaban iya senentang program ti bisi baka bantu ti bisi disediaka ngagai bala kaban gerempung.

Gempuru udah digulu urung 100 iku bala veteran ari pelilih menua Pantu, Lachau, Sri Aman and Lingga. — DayakDaily