KUCHING, Feb 18: Parti Pesaka Bumiputera Bersatu (PBB) dijangka mantaika ambis nadai lima iku orang baru ba pengawa bepilih besai tu ila.
Nya ngambika sida ulih nyilih penyandang ke udah kelalu lama ngarika sesebengkah sitak, ti nadai mandangka prestasi ke manah enggau ketegal pekara pengerai.
Nitihka penerang, nya ukai semina deka ngemaruka parti, tang ke pemadu beguna setipak enggau pengingin pengundi ba renggat ke baruh.
Entara sitak dipelaba mantaika mua baru iya nya di Mukah, Betong, Puncak Borneo, Santubong enggau Sibuti.
Kaban Parlimen Betong Datuk Amar Douglas Uggah Embas dipelaba enda ngetanka sitak Betong pengudah menang ba kerusi Kunsil Negeri Bukit Saban ba pengawa bepilih besai negeri ke sebedau tu ti ngujungka iya dichiri nyadi Sapit Kepala Menteri Sarawak.
Tan Sri Dr Muhammad Leo Michael Toyad Abdullah ke udah ngarika Parlimen Mukah kenyau ari taun 1982, lalu sitak iya dipelaba diarika Datuk Hanifah Hajar Taib taja pan bisi berita selebubu Hanifah deka diangkat nyadi chalun, nadai nerima timbal positif ari pengundi ba sitak majoriti Melanau nya.
Penyandang kerusi Puncak Borneo Datuk Seri James Dawos Mamit enggau MP Parlimen Santubong Datuk Seri Wan Junaidi Tuanku Jaafar dijangka deka meri awak ngagai raban ke biak agi, ketegal faktor pengerai. — DayakDaily
