Tebal agi pengundi S’wak Melayu nyukung BN

Datu Penguang Manggil

MARUDI, Feb 18: Majoriti pengundi Melayu di Sarawak nyukung parti komponen Barisan Nasional (BN) negeri tu, ku Menteri Muda Perintah Kandang Menua, Datu Dr Penguang Manggil.

Ku iya, semina 20 peratus ari raban nya dipechaya agi ngarika penyakal tetiap maya pengawa bepilih besai (PRU).

Iya ke mega Kaban Kunsil Negeri (ADUN) Marudi pechaya pengundi Melayu di Sarawak deka majak bejalaika tanggungpengawa ba PRU-14.

“Di Marudi, penyampau pengundi Melayu enda mayuh tang aku ke nyadi pengari rayat sitak tu nadai enda ibuhka pengelantang pendiau bansa Melayu ditu,” ku iya.

Iya bejaku munyi nya lebuh ngelu pengerami Pampang Indu enggau Nembiak Parti Pesaka Bumiputera Bersatu (PBB) ditu, malam kemari.

Dr Penguang madah, semua etnik di Marudi deka bulih bantu enggau projek pemansang ke sama rata, taja pan ari raban ke mit.

“Aku deka nentuka pemansang sama rata di Marudi baka kendang menua pesisir bukai.

“Perintah BN semampai deka nentuka peranak menua pesisir di Sarawak ngasaika pemansang baka peranak di megeri besai bukai di negeri tu,” ku iya. — DayakDaily