Pinta PH Sarawak bekaul mulaika kuasa MA63 enda sah — Abdullah

Abdullah Saidol

KUCHING, Mei 19: Pinta Pakatan Harapan (PH) Sarawak bekaul mulaika kuasa nengah Sempekat Malaysia (MA63) ngagai perintah negeri enda sah.

Menteri Muda Ba Opis Kepala Menteri, Abdullah Saidol madahka chara Chairman DAP Sarawak, Chong Chieng Jen nya enda setipak enggau dua mosyen ti udah dikemendarka semua Kaban Dewan Kunsil Negeri (ADUN) ba aum ke sebedau tu.

“Pemutus nuntut royalti minyak sereta hak negeri ti dipejuraika ba di DUN sebedau tu, udah dipesetuju semua nyengkaum penyakal.

“Tuntut ke bekaul enggau pemerat hak negeri nya patut diperunding perintah besai,” ku iya.

Abdullah madah munyi nya nimbal penerang Chong ba aum media iya kena Hari Tiga tu tadi.


Ketuai PH Sarawak nya madahka perintah negeri enda bulih kuasa ti dipulaika ti deka diberi PH sebedau Pengawa Bepilih Besai Ke-14 (PRU14) ketegal perintah negeri enggai nyain sempekat ke diri PH.

Abdullah ba penerang iya madahka pinta nya enda lam sah lalu nadai kuasa undang-undang dalam nya.

Ku iya, perintah negeri enda ngaku status Chong enggau dua agi individu ke nyain pinta nya laban ukai ngarika Perintah Besai. — DayakDaily