KUCHING, Apr 7: Lebih seribu igi buah nenas asil ari kebun dandang besai peranak Rh Banta, Kubal Batu di Jalai Lidong, Betong mujur dijual bedau lama tadi.
Pengawa ti dikemujur Opis Betanam Betupi(DOA) Betong nya udah mutarka penanggul sida sekayu rumah ti enda ulih nyual asil nya ba maya timpuh Atur Nagang Pemindah(PKP).
Seiku peranak Rh Banta ke nyadi orang bekebun nenas madah, sepemanjai timpuh PKP, sida nadai chara nyual buah nenas ke chukup mayuh nya.
“Di empa enda ga alah, di beri ngagai orang sesepiak bela ga bisi enggi diri.
“Deka di anjung ke rumah panjai bukai enggai ga nyadi. Penusah sereta penanggul tu cukup ngenusah ke ati bala kami serumah,’ku iya.
Berindik enggau nya, iya berasai lantang pengudah DOA Betong udah ngatur pengawa dikena mantu sida ke bisi bekebun dandang besai ngambika utai tanam enda buruk sereta jai pia aja.
Ku iya, DOA Betong nengah kerejasama Pertubuhan Peladang Kawasan Saribas(PPK) udah meli lalu ngambi nenas nengah chara burung.
“Nyadi, baka ke seharitu, kami serumah ulih ngeluarka lebih seribu igi buah nenas.
“Semua nya dibeli sida nengah chara burung. Berasai lantang sereta temegah ati kami serumah meda atur ke bakatu,” tandu iya. —DayakDaily
