‘Pengerami Gawai renggat menua tauka negeri meseti mai otoriti negeri’

Mawan datai bejadi Gawai Bazaar SDNU di Palan Kristian Ekumunikel di Kuching ditu.

Dikarang Chris Bishop

KUCHING, Mei 20: Pengerami Gawai renggat negeri enggau menua patut diatur nengah kerejasama otoriti negeri ke bekaul, ku Presiden Sarawak Dayak National Union (SDNU) Tan Sri William Mawan.

Ku iya, semina nengah chara nya pengerami ulih diangkat tinggi agi lalu nyadi forum ti tau matak rayat pupu bansa di negeri tu berakup.

Bejaku ngagai pemberita seharitu, Mawan madah enda lantang enggau atur pengerami gawai renggat menua di Bintulu kena Hari Enam tu tadi ke diatur sekeda raban orang.

“Kitai udah lama ngintu pengerami gawai baikka nya ba renggat negeri tauka menua.

“Enti pengerami nya matak bala ketuai menua tauka negeri, kitai meseti ngangkatka status pengerami lalu enda ngira sekalika diatur ditu tauka di Kuala Lumpur.

“Tang meseti diatur nengah kerejasama sereta embing ari otoriti negeri ke bekaul,”ku iya pengudah bejadi Gawai Bazaar SDNU di Palan Kristian Ekumunikel (CEC) ditu.

Mawan (kiba) ngemata sekeda barang ke bisi dijual ba Bazaar Gawai SDNU 2019.

Mawan ke mega Adun Pakan nambah, SDNU udah lama ngintu lalu ngemujur pengerami gawai di Sarawak.

Ku iya, maya gawai ditetapka diintu Jun 1 kenyau 63 taun suba, SDNU udah ngerembaika forum lalu matak bansa Bidayuh enggau Orang Ulu sama bela ngadu kerejasama ngemujur pengerami.

“Kitai ngaga gintir, baka ke taun tu pengerami gawai diintu bansa Bidayuh, alai enggau nya bansa Iban enggau Orang Ulu bela sama ngambi bagi sereta meri sukung.

“Pia mega enti idar bansa Iban ngatur, bansa Bidayuh enggau Orang Ulu deka meri sukung. Pengerami gawai tu enda kala dikuasa siti bansa,” ku iya madah enggau nyemetak.

Berindik enggau nya, Mawan ngelalau bala sekeda ti ngintu gawai nya kediri, sida tau madah gawai nya enggi sida aja.

Ngenang kaul ke sama, Mawan netapka pengerami gawai renggat negeri tauka menua meseti nitihka protokol lalu bebasaka adat sereta main asal maya ngintu gawai.

Enti enda pia ku iya nambah, pengerami gawai deka diayah pia aja.

“Semua pekara tu udah dipebasa kelia menya, gawai tau berengkah tumu alai pengawa ngiling bidai tau mega diatur laun.

“Tang sapa ke bisi kuasa ngetuka semua tu enti nadai otoriti, enti nadai protokol. Pekara tu ngujungka pengerami gawai diayah pia aja,” ku Mawan.

Gawai Bazaar SDNU di Palan Kristian Ekumunikel(CEC) berengkah Mei 19-24 lalu dibuka ari jam 10 pagi nyentuk ngagai 11 malam.

Penyampau 74 bangsal bejual pemakai, ai irup, kuih tradisyenal Dayak, asil ari pengelandik jari, pekayan, perengka ngias tubuh, studio pantak enggau karaoke bisi dibuka ngagai mensia mayuh. — DayakDaily