“Parallel Government” diseliah ungkup pemaik rumah panjai – ADUN Krian

Ali Biju

KUCHING, Nov 9: Atur ngetuka sementara bayar elawin ngagai tuai rumah di Sarawak digaga ketegal Komiti Pemansang enggau Pengelikun Perintah Besai (JKKKP) udah dikinsil, ku Kaban Kunsil Negeri (ADUN) Krian Ali Biju.

Ku iya, agih belanja (elawin tuai rumah) ari Perintah Besai Barisan Nasional ke dulu diketu pengudah Pengawa Bepilih Besai Ke-14.

“Menteri Besai ngeletakka pemutus tu ketegal nyata JKKKP udah nyadi perengka politik perintah ke dulu. Berindik enggau nya, Pakatan Harapan (PH) numbuhka ‘Majlis Pengurusan Kemajuan Kampung (MPKK) ba negeri ke dipegai PH.

“Ungkup Sarawak, Opis Menteri Pemansang Menua Pesisir nguna sistem JKKK ke lama,” ku Ali ba debate rambau Aum Dewan Undangan Negeri (DUN) sehari tu.

Iya nambah, tuju Pakatan nguna sistem JKKK di Sarawak ngambi ulih nyeliah “Parallel Government” tauka Komiti Bertindih.

Ali madah komiti ‘Parallel Government’ semina deka mai penyarut lalu tau mechahka rumah panjai.

Pekara tu kala nyadi di Semenanjung Malaysia, alai Perintah PH maya  nya megai sekeda negeri.

“Parallel Government tu meseti diseliah. Perundingka enti rumah panjai bisi dua komiti enggau dua iku ketuai,” ku Ali.

Berindik enggau nya, iya minta Perintah Negeri Sarawak nerima agih belanja RM35 juta ari Perintah Besai dikena mayar elawin tuai rumah berengkah 2019.

Ngenang kaul ke sama, iya madah tuai rumah meseti ngintu rumah panjai enggau adil, enda ngira bida politik.

Aku setujuka Seksyen 8(1) “Ordinan Ketua Kaum dan Ketua Masyarakat 2004” ti enggau nyemetak netapka tuai rumah ditagang ngembuan penuduk ba parti politik, tandu Ali.

Iya nambah, tuai rumah sigi dipilih peranak rumah panjai lalu nya bepelasarka adat sempekat tetiap rumah panjai alai nadai champur jari ari orang luar ke nadai kaul enggau sempekat rumah panjai.

“Chara milih tu digaga nengah atur demokrasi lalu dikemujur nengah proses aum,” ku Ali. — DayakDaily