KUCHING, Sept 8: Kaban Parlimen (MP) Sri Aman Datuk Masir Kujat berunding deka nyurutka diri tembu renggat parlimen tu.
Bejaku ba pengerami bejadi tiang pemun bekal letrik di Rh Achang, Muding Danau di Pantu bedau lama tu tadi, iya madah deka meri awak ngagai orang ke biak.
“Taun tu udah masuk 11 taun aku nyadi MP ditu lalu bisi laluh empat taun agi.
“Aku berunding, lalu ngasaika diri deka ngetu. Sida ke biak tau agi diasur mangku pengawa MP ditu.
“Chukup mih 15 taun, tiga renggat nyadi MP,” ku iya ke kala mangku pengawa Sapit Menteri Dalam Menua sebedau Pengawa Bepilih Besai Ke-14.
Berindik enggau nya, Masir ke mega Mandal Presiden Parti Rakyat Sarawak(PRS) ngelalau rayat di sitak parlimen Sri Aman nyukung chalun Gabungan Parti Sarawak (GPS) ba pengawa bepilih nengeri ke disadang diatur ba taun 2021.
Sitak parlimen Sri Aman mungkur 3 Sitak Kunsil Nengeri(DUN) iya nya Balai Ringin, Bukit Begunan enggau Simanggang.
DUN Balai Ringin diarika Datuk Snowdan Lawan(Ketuai Bagi Nembiak PRS), DUN Bukit Begunan diarika Datuk Mong Dagang(PRS) lalu DUN Simanggang, Datuk Francis Harden ari Parti Se’ Ati Rakyat Sarawak(SUPP).
“Beri sukung kita ngagai ketetiga pengari rayat tu ngambika sida menang besai lalu GPS mengkang merintah Nengeri Sarawak,”ku Masir.
Ba Pengawa Bepilih Besai Ke-14 (GE14) Masir menang di Sitak Parlimen Sri Aman nengah majoriti 5,820 undi.
Iya ngalahka chalun ari Parti Keadilan Rakyat(PKR) Norina Umoi enggau chalun Parti Bansa Dayak Sarawak Baru (PBDSB) Cobbold John.
Ba GE14 nya, Masir bulih 14,141 undi, Norina (8,321) lalu Cobbold bulih 538 undi. — DayakDaily
