Maya PRU14 diatur deka diperati ari mayuh bengkah sukut

Tan Sri Mohd Hashim Abdullah

KUALA LUMPUR, Mac 20: Pengawa nentuka timpuh bekimpin ba Pengawa Bepilih Besai Ke-14 (PRU14) bela beratika bemacham sukut pekara nyengkaum musim pengerami, pia ku Chairman Komiti Pengawa Bepilih (SPR) Tan Sri Mohd Hashim Abdullah.

Ku iya, kelimpah meseti nitihka atur 11 hari timpuh minimum bekimpin ti ditetapka, SPR enda tau netapka timpuh bekimpin nitihka peneka barang bagi parti politik ke deka bediri minta pilih.

“Ari sukut timpuh, bepanggai ba kuasa SPR. Ba SPR, kami meseti beratika mayuh sukut. Meseti beratika kalender, PRU kena bulan berapa…sekalika bulan puasa tauka hari raya? semua nya meseti kami peratika.

“Enti nanya aku, aku setuju aja, (timpuh kimpin) panjai pan enda ngawa, pandak pan enda ngawa tang kami ngarapka bisi atur ba pengawa bekimpin,” ku iya ba sesi tanya saut maya meri penerang ngagai Media enggau Pengawa Bepilih di Wisma Bernama ditu.

Mohd Hashim madah munyi nya lebuh nyaut tanya Menijar Besai Gerempung Berita Nasional Malaysia (Bernama) Datuk Zulkefli Salleh sentang pinta sekeda parti politik ti dekaka timpuh kimpin ke panajai agi maya PRU14.


Sentang kimpin undi rusak ti disadung ba media sosial baru-baru tu, Mohd Hashim madahka raban nya enda patut mantaika pengeringat nengah chara nya tang patut nguna kuasa sida ke nyadi pengundi milih perintah ke megai menua.

Ku iya, laban menua udah merdeka pengelama 60 taun sereta deka ngatur PRU ke-14, ulah ke baka nya enda patut nyadi.

“SPR nadai rugi nama-nama. Deka ringat ngagai parti politik? Nya ukai chara iya, enti ringat ngagai parti politik, ngundi meh,” ku iya.

Ba PRU13, Mohd Hashim madahka bisi 173,868 tauka 1.3 peratus undi udah ditulak ari semua 13.26 juta pengundi antara nya ketegal keretas undi di chunting nyentuk ke ditemu bagi chalun ke dipilih tauka ketegal myunting semua chalun.

“Nya alai, ba PRU14 tu, bisi enda pekara ke sama digaga tauka enda?” ku iya seraya minta kerejasama media mantu SPR meri penyedar ngagai pengundi sentang pekara tu. — DayakDaily