KUCHING, 2 Ogos: Pelilih Kuching ti ba status Zon Merah betukar ngagai Zon Kuning seharitu pengudah semina 39 kes positif Covid-19 dirikod dalam timpuh 14 hari ke udah.
Komiti Pengintu Penusah Ngenyit Negeri Sarawak (JPBNS) nengah siti surat penerang berita madah, 4 pelilih menua iya nya Lundu, Bau, Serian enggau Samarahan mengkang status Zon Kuning alai 35 pelilih bukai ba status hijau.
“Seharitu nadai kes baru positif Covid-19 dirikod lalu penyampau semua kes positif di Sarawak mengkang 678 kes,” ku JPBNS.
Komiti mega madahka bisi 3 kes udah gerai lalu dikemendar pansut ari Spital Besai Sarawak (SGH) seharitu.
Enggau nya, penyampau kes positif Covid-19 ke udah gerai manggai 594 iku tauka 87.61 peratus ari penyampau semua kes.
Penerang berita nya mega madah bisi 10 kluster mengkang aktif iya nya Kluster Syarikat Kejuruteraan (8 kes), Kluster Mambong (7 kes), Kluster Pusat Perubatan (3 kes), Kluster Jupiter (3 kes) dan Kluster Pasar Stutong (7 kes), Kluster Jeti Kuching (2 kes), Kluster Sentosa (31 kes), Kluster PUI Melbourne (3 kes), Kluster Syarikat Pembinaan (2 kes) enggau Kluster Pasar Satok (4 kes).
Naka ke diatu, bisi 65 iku mengkang diperubat ba wad isolasyen spital lalu penyampau kes mati mengkang 19 iku tauka 2.8 peratus. — DayakDaily
