KPDNKK puas ati orang dagang nitihka atur enda neritka agi GST

Md Nawawi Abdul Rahman

KUCHING, Jun 2: Chukai Barang enggau Servis (GST) udah diteritka berengkah ari kemari.

Tinjau ti dipejalaika beratika bala orang dagang meri kerejasama ke manah ngagai atur nya lalu rega barang rangkai diatu diturun ngagai enam peratus.

Ketuai Penerit adat Opis Menteri Dagang Dalam Negeri, Koperasi enggau Pekara Bebeli Barang (KPDNKK) Sarawak, Md Nawawi Abdul Rahman lebuh ke dikerandau, madah raban opis nya udah bejalaika ‘Operasi Catut 4.0’ berengkah ari pagi kemari dikena nyidi orang dagang ke keras deka nipu rega barang.

Operasi dipejalai begulai enggau Opis Kastam Diraja Malaysia sereta Majlis Bandaraya Kuching Selatan (MBKS).
“Kita udah tama ngagai premis-premis deka nentuka orang dagang nitihka atur baruh nya.

Ku iya, dalam sistem dagang tebuka, orang dagang patut ngengkah rega ke baruh agi banding enggau sebedau GST dikurangka.

Iya ke mega Timbalan Pengarah KPDNKK Sarawak madah, sida semampai deka matau dikena nentuka atur baru nadai agi GST nya dititihka ke pemaik rayat. — DayakDaily