Tanka tanggam kaul enggau bansa bukai — Harden

Datuk Francis Harden Hollis - file pic

SRI AMAN, Jun 2: Kaul rat bansa Dayak enggau bansa bukai ngelqma tu patut ditanka, pia ku Menteri Muda Pengelantang Komuniti, Datuk Francis Harden Hollis.

Nya ku iya, ngambika kitai sama ulih begulai ngemansangka negeri tu.

Harden ke mega Kaban Kunsil Negeri Simanggang madah, penyerakup ke udah ditempa ngelama tu paut ditegapka kelebih agi maya musim pengerami nyengkaum Gawai.

“Pengawa ngabang ngagai pangan diri patt majak dikemeran ngambika ulih negapka kaul ba bansa Dayak nyengkaum enggau bansa bukai di negeri tu,” ku iya.

Iya mega minta sida ke biak semampai bebasaka raban orang tuai, kelimpah belajarka daya pengidup bansa diri ngambika enda punas pia aja.

“Rebak biak patut belajarka penemu enggau adat lama bansa diri ngambi enda punas jemah ila,” ku iya.

Iya bejaku munyi tu ba pengerami nyambut pengabang Hari Gawai di rumah iya kemari.

Sama bisi datai ngabang ngagai rumah iya kemari, Menteri Pengawa Berumah enggau Kunsil Kandang Menua ke mega Presiden Parti Sa’ati Rakyat Sarawak (SUPP), Datuk Dr Sim Kui Hian, Ketuai Indu SUPP Simanggang, Ling Siew Hung, Temenggung Kuek Aik Seng enggau bala ketuai ke bukai sereta mega lama temuai bukai. — DayakDaily