KUCHING, Julai 2: Akademi Serakup Dayak Iban Sarawak (Asadia) ti muka kelas ngajar bemacham main asal diatu bela dikerindu bala pelajar universiti.
Nitihka penerang Ketuai Asadia Mabong Unggang, ba kelas àjat indu renggat ke-12, bisi 18 iku orang indu udah ngerijister diri.
Ku iya, tebal agi raban nya ngarika raban pelajar sereta graduet universiti.
“Sekeda ari raban tu datai ari Pelilih Serian iya nya ari Kampung Lebur.
“Tu mandangka pengangkun enggau pengerindu bansa kitai ba main asal chukup tinggi,” ku Mabong.
Kelimpah ari nya tambah Mabong, bala apai indai diatu pan bela besaup ngenanka main asal Iban alai sida bisi ngerijista anak sida nitihka kelas main asal.
Dikena nentuka main asal dinan lalu dipandang ngagai mensia mayuh, Mabong merambu tetiap sitak kunsil nengeri tauka parlimen ngatur kelas main asal Dayak.
Pekara nya ku iya deka ngemudah bala nembiak Dayak belajarka main asal lalu nibuh nurun ngagai Kuching tauka mengeri bukai ke jauh ari menua sida.
“Enda semua orang ti deka belajar tauka rindu ke main asal ulih ngelimpang kediri mindah jauh agai palan belajar.
“Enti bisi palan belajar ke semak,tentu mayuh agi orang ulih belajar lalu nyaup ngenan ke main asal,” ku iya.
Kelimpah ari ajat indu, Asadia mega deka muka kelas ajat lelaki, kelas sape enggau belikan, gendang pampat, kuntau, kelas ngaga kain burie, sereta ngaga tangu enggau betaboh .
Asadia mega bisi ngatur kelas ajat Orang Ulu, kelas birejang beuh (ajat Bidayuh) enggau Biruguong (taboh Bidayuh tunga ke Bau). — DayakDaily
