Karam di Darat, penusah ke majak nyadi sereta balat ngirau

Gambar dikunsi Chairman DAP Katibas Paren Nyawi mandangka penusah angus ke nyadi di Rumah Nanga Makut, Katibas, Song kena 25 September 2018.

“This article is a translation of Longhouse fires in Sarawak, a growing concern — Part 1 originally published on December 16, 2018.”

Translation by Chris Bishop

PENUSAH angus rumah panjai diatu bukai pekara baru tauka penusah ke jarang nyadi di Sarawak.

Ninting bulan kitai ninga riput rumah panjai angus ti ngujungka mayuh orang nadai endur diau agi.

Baka ke suah, pengudah penusah tu nyadi, otoriti ke bekaul, pengari ke dipilih rayat, ijinsi ukai di kuasa perintah sereta mensia mayuh deka sama bela besaup meri bantu. Bantu ari sukut wang ringgit, pemakai, pekayan, perengka berumah enggau bantu bukai dianjung ngagai mansa.

Ngelama ke udah, penusah tu enda balat ngirau ketegal semina nyadi sekali tauka dua dalam timpuh setaun. Tajapia diatu, udah bisi ubah ba statistik alai enggau enda disadang penusah angus rumah panjai tu udah majak nyadi.

Statistik mandangka penusah tu nyadi ukai sekali tauka dua dalam timpuh setaun. Rikut ngayanka penusah nyadi sekali tauka dua kali dalam timpuh sebulan.

Naka 16 Disember 2018, penyampau 24 iti rumah panjai udah napi penusah angus. Ba taun ke udah (2017), 26 kes dirikut. Ba taun 2016 bisi 20 kes.

Kena 12 Disember 2018, Rh Sambau, Nanga Entulang di Sri Aman angus, penusah nabanka nyawa siku orang tuai (indu) sereta ngujungka 200 iku peranak rumah panjai 28 bilik nya nadai endur diau agi.

Ba bulan November 2018, tiga rumah panjai iya nya siti di Sungai Asap Belaga (30 bilik), Sungai Keriok di Niah (28 bilik) enggau Nanga Melayong Sungai Mururun (15 bilik) angus.

Nitihka penerang Opis Bomba enggau PenyahPenusah Negeri, penyampau 431 ari 680 bilik angus alai pengerugi manggai RM14.8 juta ba taun 2018 aja.

Ba taun 2017, 357 bilik angus lalu pengerugi manggai RM19 juta. Ungkup taun 2016, bisi 417 bilik angus alai pengerugi dirikut RM16.1 juta.

Irauka penusah karam di darat tu majak nyadi, DayakDaily bejuraika isu tu sereta ngarap ulih nyaup tetemuka kebuah penusah tu majak nyadi sereta berundingka chara nyeliah.

Berindik enggau nya, DayakDaily ngadu siri riput tu enggau tuju nerenak pemereti sentang pemanah enggau penusah ke tau nyadi ari api.

Meda mansa nadai endur diau sigi tau ngasuh sinu alai penusah ke baka tu ulih diseliah. Kitai patut bebendar nguji bejalaika tanggungpengawa diri ngambika semua kitai ulih idup enggau likun baikka nya di rumah panjai tauka endur bukai.

Pemerinsa

Tetiap kali penusah angus rumah panjai nyadi, beratus iku mansa deka ngasaika pemerinsa. Pemedis enggau penyinu ke diasaika sida ti tasah enda ulih dikira ketegal sekeda nya udah nguwan rumah panjai lebih ari 80 taun.

Asaika semua reta enggau rumah panjai angus diempa api dalam berapa minit aja dimua mata diri. Sida ke tasah tu tebal agi orang bumai ti kurang penatai pemisi.

Penusah tu ngujungka mansa lenyau semua reta. Kelimpah ngemata rumah panjai sereta duit ke disimpan angus, mansa mega deka napi penanggul mayar lun entuka tauka mutusikal.

Peranak Rumah Usek Sumpit ngumbuk siku orang indu ti nyabakka rumah diri ti angus di Niah kena 24 November, 2018.

Dianggarka bisi urung 3,500 rumah panjai tauka genturung pendiau mit di serata negeri alai sekeda jauh di menua ulu. Tetiap rumah panjai tu bisi 10 nyentuk ngagai 40 bilik. Siti bilik diwan siti ruang bilik iya nya urung lima ngagai 10 iku.

Kitai suah meda diak rumah panjai tu didirika besemak enggau sungai sereta jauh ari mengeri. Ketegal rumah tu digaga ari kayu, api ulih makai kayu tu enggau mudah dalam timpuh berapa minit aja.

Nambahka nya, tebal agi peranak rumah panjai nyimpan pesaka lama alai ngemata semua pesaka nya angus diempa api sekelip mata chukup merinsa ungkup sida.

Udah tentu mega ngasuh kitai balat sinu ngemata mansa nyabakka rumah ti benung diempa api, kelebih agi enti penusah bisi nabanka nyawa.

Ba mayuh kes angus tu, Bomba enda ulih mantu mayuh ketegal sekeda rumah panjai enda disikap enggau perengka madam api kelimpah ti jauh di ulu. Sekeda nya urung 150 km ari stesyen Bomba ke semak.

Enti bisi dampih enggau stesyen Bomba pan, sekeda penanggul ke ditapi iya nya nadai bekal ai, tekan ai enda kuat, jalai nuju rumah panjai sempit lalu enda ulih dipasuk entuka Bomba tauka sigi ke nadai jalai sekali.

Penanggul bukai ba sekeda kes, raban Bomba nguna perau (bot) nuju palan penusah alai sekeda nya begunaka timpuh dua jam.

Berindik enggau nya, sekeda chara meseti dipejurai enggau lengkas ngambi ulih dikena nyeliah penusah tu nyadi. Ijinsi ke bekaul meseti berandau, begigaka chara sebedau mayuh agi rumah panjai angus. — DayakDaily

Anti Tusun Kedua udah tu.