Entulu mengkang enda engkeretik taja diberita enda dichalun ba PRU14

MIRI, Feb 24: Menteri ba Opis Menteri Besai Datuk Joseph Entulu Belaun agi enda engkeretik bekaul enggau singkang iya taja pan ripot berita madahka iya enda dichalun ngenanka kerusi Parlimen Selangau ba Pengawa Bepilih Besai ke-14 (PRU14).

Taja pan ditanya media sentang karier politik iya, tang Entulu, 64, ke mega Sapit Presiden Parti Rakyat Sarawak (PRS) enggau penyandang kerusi Selangau kenyau ari taun 2004, semina ngilikka pala.

Taja pia, lebuh ke dikerandau media pengudah ngulu pengerami makai lemai diatur Kelab Penyerakup Miri malam tadi, iya semina nyaut, “Enti udah datai ba maya iya, aku ngatur aum pengarang berita”.

Presiden PRS ke mega Sapit Kepala Menteri Sarawak Tan Sri Dr James Jemut Masing minggu tu dibantaika ba media ke alai kerusi Parlimen Selangau enggau Lubok Antu seka diarika orang baru parti nya ba PRU14 ila.

Masing mega madahka parti nua agi ngenanka penyandang kerusi Parlimen Sri Aman, Julau, Kanowit enggau Hulu Rajang.
Entulu nyadi fokus pengudah Aum Pengari Tiga Taun Sekali Ke-4 PRS di Bintulu ba taun 2016 lebuh iya dipilih baru nyadi sapit presiden parti.

Iya mangku penuduk nya kenyau ari taun 2006 ngalahka ex- Sapit Menteri Pemadah, Penyambung enggau Main Asal maya nya ke mega Mandal Presiden parti, Datuk Jospeh Salang Gandum, 68.

Pengudang menang ngerebut penuduk sapit presiden, Entulu diripot bisi nyebut madahka pemutus bepilih parti siti mesej ke kuat ari pengari ba renggat ke baruh ti dekaka iya ditanka ba PRU14 semadi mih iya nulak dichalun baru. — DayakDaily