Duriankimchi enda bebasaka adat enggau budaya Iban

Neilson (kanan) begambar begulai enggau bala indu bansa bukai ti rinduka ngepan Iban.

Dikarang Chris Bishop

“Orang ringat ngagai jaku bantah nya laban iya (Ryzal) ngutuk ngepan alai nya mega sebaka enggau ngutuk orang ti bekenaka ngepan”

KUCHING, 30 Mei: Ulah selebriti media rama Ryzal Ibrahim ngemaruhka sereta bejaika ngepan asal bala indu bansa Iban sebengkah penemu ti enda bebasaka adat enggau budaya bansa bukai.

Nitihka Prof Madya Dr Neilson Ilan ari Fakulti Sains Sosial, Universiti Malaysia Sarawak (Unimas), ulah ke baka nya enda patut dikembuan di Malaysia ketegal menua tu ngembuan mayuh pupu bansa.

Neilson ngasai penemu sereta video pengelama 50 saat ti digaga Ryzal nengah akaun facebook Duriankimchi kena Hari Tiga tu tadi udah ngasuh bala Iban berasai teguran sereta tegepang ati.


“Gawai nyau udah semak tang bala Iban berasai teguran sereta tegepang ati laban siti berita ti pansut ba media rama ti ngemaruh sereta bejaika ngepan asal bala indu bansa Iban.

“Utai baka tu enda patut nyadi kelebih agi lebuh bala iban benung kiruh kisuh deka berami nyambut Gawai tajapan gawai taun tu enda baka ti udah-udah laban penyakit Covid-19.

“Enda mukai-mukai ari ati ti ransing deka nyambut Gawai lalu bebali nyadi ati kudi ati ransi,” ku Neilson bejaku ngagai DayakDaily.

Tambah Neilson, Ryzal patut ingat diak tiap iti pupu raban bansa ba Malaysia tu endang sigi dijaga undang-undang menua lalu enda ulih diperujan tauka  diperintah kitai enggau penemu ti enda manah kelebih agi besangkut paut enggau adat tauka asal sida.

Ku iya, United Nation mega nyaga kuasa pupu raban bansa indigenous ngena United Nations Declaration on Human Rights of Indigenous People.

Resolusi nya diterima United Nations General Assembly kena 13 September, 2007 menya.

“Lebih agi ari nya, enti kitai enggai dikemaruhka orang baka kitai ti ngemaruhka orang, dia alai kitai enda patut ngereja nya. Indah enda baka jaku sempama getil isi orang getil ga isi diri.

“Orang ringat ngagai jaku bantah nya laban iya (Ryzal) ngutuk ngepan alai nya mega sebaka enggau ngutuk orang ti bekenaka ngepan.

“Tu meh utai ti ngasuh ati bala Iban ensiban sereta kebawan. Nya alai naka sehari tu mayuh endar ripot polis udah digaga,” tandu Neilson.

Berindik enggau nya, Neilson ngarap utai ti enda manah baka tu enda ditandu agi tajapan tu ukai keterubah iya orang ketawa tauka ngemaruhka ngepan Iban.

“Kitai deka ka pengelikun lalu senutuk enggau Mengeri Kuching Sarawak ti digelar “City of Unity”.

“Kita sama nguna pemayuh raban ti ngembuan mayuh macham adat asal enggau budaya nyadika pengering kitai lalu ukai mansutka penemu tauka mandangka utai ti tau ngasuh ati bansa bukai ensiban ati.

“Laban liur ke udah diludah enda ulih ditelan agi,” ku Neilson. — DayakDaily