KUCHING, Dis 20: Divisyen Pertama Infrantri Malaysia udah sedia mantu Komiti Mutarka Penusah Ngenyit Negeri (JPBN) napi penusah ampuh bah di negeri tu.
Panglima Divisyen Pertama Infrantri Malaysia, Mejar Jeneral Stephen Mundaw madahka soldadu di Sarawak seruran sedia mantu sereta bekerejasama enggau ejensi oerintah ke bukai nyengkaum JPBN bejalaika pengawa nyelamat maya ampuh bah.
“Raban enggau aset soldadu udah sedia diguna sebarang maya ngambika ulih meri bantu ngagai mensia mayuh ke tasah,” ku iya.
Maya napi penusah ke baka tu, soldadu mega sedia sereta udah belatih napi ampuh bah enggau ejensi penyelamat ti ari baruh kemata Opis Pengelantang Raban Bansa (JKM).
Ku iya baru, raban pematau soldadu udah dipinta matau kandang menua ke dipelaba tau ampuh bah.
Penusah ampuh bah di Sarawak diatu bedau datai ba tikas ti ngirauka ati, tang mensia mayuh dilalau bejejaga. — DayakDaily
