MPKS: Polistirena, kambut plastik enda dikemendar dikena berengkah Januari 2018

Polystyrene litter. — DayakDaily.com file pic. // Photo: Pixabay

KOTA SAMARAHAN, Dis 21: Majlis Perbandaran Kota Samarahan (MPKS) enda ngemendarka nguna polistirena enggau kambut plastik berengkah ari bulan baru.

Chairman MPKS, Dato Peter Minos madahka pemutus nya mandangka sukung ngagai Opis Menteri Kandang Menua Sarawak ti enda ngemendarka ngena kereban nya.

Kambut plastik enda dikemendarka dikena ninting Hari Minggu, ku iya ba aum media ditu kemari.

Menteri Muda Pengawa Berumah enggau Kaunsil Kandang Menua, Datuk Dr Penguang Manggil dipadahka bisi minta opis bekuasa kandang menua nitihka inisiatif ti diambi Majlis Bandaraya Miri enggau Majlis Perbandaran Sibu ti enda ngemendarka nguna plastik ba pengawa bebeli barang.

Ba kaul bukai, Minos madahka pasar malam MPKS di Uni Garden ditu deka berengkah dibuka pun taun baru ke bisi nyendia 60 buah palan bejual.


“Pasar malam nya dibuka berindik ari palan nya tebilang nama ba bala temuai kelimpah meri awak ngagai pedagang mit nambahka penatai pemisi sida,” ku iya seraya madahka kaunsil nya udah nerima agih belanja RM 500,000 ari perintah negeri dikena numbuhka pasar malam nya.

Minos mega madahka berengkah ari bulan Januari 2018, sida enda ngemendarka pengawa bejual dipejalaika ba palan bas ngetu di Kota Samarahan. — DayakDaily