BN Sarawak mantaika 15 orang baru ba PRU14

Barisan Nasional logo.

KUCHING, April 24: Barisan Nasional (BN) Sarawak sehari tu tadi udah mantaika 15 orang baru ti deka ngarika parti nya ba Pengawa Bepilih Besai Ke-14 (PRU14) kena Mei 9.

Chairman BN Datuk Patinggi Abang Johari Tun Openg madahka enam orang baru nya ari Parti Pesaka Bumiputera Bersatu (PBB), ke alai Ketuai Nembiak PBB Piasau Lukanisman Awang Sauni nyadi chalun ke pemadu biak, 36 taun di Parlimen Sibuti.

Lukanisman sebedau tu gawa nyadi Pemesai JASA di Miri. Iya nyilih Datuk Ahmad Lai Bujang, ke bisis penaggul pengerai.

Orang baru ke bukai ari PBB iya nya Genot@Jeannoth Sinel di Parlimen Puncak Borneo nyilih Datuk Seri Dr James Dawos Mamit.

Robert Lawson Chuat bediri di Parlimen Betong, besilih enggau Datuk Amar Douglas Uggah Embas ba kerusi Bukit Saban maya Pengawa Bepilih Kunsil Negeri 2016.


Yusuf Abd Wahab, 55, siku konsultan dipilih nganti Datuk Norah Tun Abdul Rahman Ya’akub di Parlimen Tanjong Manis lalu Ahmad Johnie Zawawi dipilih nganti Datuk Abdul Wahab Dollah ba Parlimen Igan.

Calon baru indu tunggal PBB Datuk Haniffah Hajar Taib, anak bunsu Yang di-Pertua Negeri, Pehin Sri Abdul Taib Mahmud deka bediri di kerusi Mukah.

Chalun baru Parti Progresif Demokratik (PDP) Subeng Mula bediri di Parlimen Saratok nganti Tan Sri William Mawan Ikom.

Presiden SUPP, Datuk Dr Sim Kui Hian deka bediri ba Parlimen Stampin lalu Sekretari Besai SUPP, ke mega Adun Piasau, Datuk Sebastian Ting betanding di kerusi Parlimen Miri.

Adun Repok, Samuel Huang dikearap ngambi pulai kerusi Sarikei.

Parlimen Bandar Kuching diarika chalun indu ari SUPP Kho Teck Wan lalu Parlimen Lanang diarika, Kelvin Kong.

Anak kepada Datuk Seri Dr Wong Soon Koh dikeandal ngarika BN-SUPP ngerampas Parlimen Sibu.

Dua chalun baru Parti Rakyat Sarawak (PRS), Rita Sarimah Insol di Selangau enggau Robert Pasang Alam ba kerusi Lubok Antu.

Datuk Seri Dr Wan Junaidi Tuanku Jaafar, Datuk Seri Rohani Abdul Karim enggau Datuk Seri Richard Riot Jaem agi ngenanka penuduk diri. — DayakDaily