Bansa Asal Sarawak dipinta nyukung ngangkatka Tikas Kort Bumiputera

Andrew Paul

KUCHING, Jan 20: Semua Raban Orang Asal dipinta nyukung penemu nikika tikas Kort Bumiputera sama enggau Kort Civil sereta Kort Syariah.

Chairman Sadia pampang Krian, Andrew Paul madah pekara nya munyi ke bisi disebut Ketuai Hakim Menua Malaysia Tan Sri Richard Malanjun lebuh ke bejurai keretas kerja iya ba “Borneo Rainforest Law Conference 2019” di Kota Kinabalu kena Januari 17, 2019 tu tadi.

Andrew pechaya jaku Richard nya cukup manah ke peranak Orang Asal ba menua tu laban enggau chara niki ke tikas Kort Bumiputera, hak sereta adat Orang Asal bisi reti lalu diterima.

Pekara nya ku iya ngipakka pengandal orang asal ke nyukung penumbuh menua Malaysia baka ke bisi ditulis ba Genteran 160(2) Sempekat Penumbuh Menua Malaysia.

“Tu meh pekara ke bendar dikeringka orang asal nengah raban NGO iya nya semina ngandal ke hak enggau adat asal tu diterima baka adat asal ke endang amat sereta meruan udah dikena Aki-Ini Bansa Asal dulu agi ari Perintah Brooke tauka Perintah Malaysia lalu agi dikena nyentuk ke seharitu.

“Ambi ke cunto baka Adat Pulau Galau enggau Pemakai Menua, kenyau ari ke bisi udah ditulis ba bup Sejarah maya kes Pengulu Dalam dalam taun 1890 sampai ke seharitu, endang agi amat dikena orang asal.

“Orang ke datai ari sebengkah menua enda tau begiga ke perengka babas tauka ngasu beburu ngagai Pemakai sebengkah menua bukai enti nadai pemendar,” ku Andrew nengah surat penerang berita seharitu.

Andrew nambah, enti bisi nyadi sida ari sebengkah menua ke ngerenchah Pemakai Menua bukai, sida tu tau diukum enti sida nadai dulu minta pemendar.

Adat tu ku Andrew sigi seruran dipadah ke orang tuai ngagai anak orang asal kenyau ari sida agi mit awak ke seruran bebasa ke Pemakai Menua enggau Pulau Galau orang menua bukai.

Tang ba kes TR Sandah ku iya nandu, kitai sama meda Hakim Raus Shariff ngena “penemu ia ba Undang undang Kort Civil’, muntang endar madah ke Adat Pemakai Menua tu nadai “Force of Law” ketegal Adat tu ke nadai bisi ditulis ba Adat Iban 1993 tauka Kod Tanah Sarawak.

Tajapan sema jaku pagila pan nuan ngerenchah lalu begiga ba Pemakai Menua Orang bukai enggau nadai pemendar, nuan tau diukum orang ke ngempu menua nya nitih ke Adat Orang Asal.

“Ba aku, enggau pekara ke nyadi tu kitai patut nanya diri empu, nama reti undang-undang Pemakai Menua Orang Asal nya enti ia bisi “kuasa ngukum” orang ke ngerencah Pemakai Menua Orang bukai enti Adat Pemakai Menua nya nadai Kuasa Undang-Undang?

“Lalu nama reti Adat Pemakai Menua nya alai nyentukka seharitu Orang Asal mereti sereta nitih lalu nerima Adat Pemakai Menua nya?

“Enti kitai berunding, enti nadai Kuasa Undang-undang ba Adat Pemakai Menua Orang Asal nya, tentu nadai ga Orang Asal deka nitih tauka nerima Adat Pemakai Menua nya sampai seharitu,” ku Andrew.

Ngenang kaul ke sama, iya madah Adat Orang Asal baka Adat Pemakai Menua tu ukai pekara ke nyelai.

Adat baka tu mayuh sama enggau Adat Bansa Asal ba menua bukai dalam dunya tu.

Nya alai Adat ke baka Pemakai Menua tu endang lama udah dipansik, dikira, diterima, ditan serta dikeringka Raban Gerempong Dunya (UN) nengah “ILO Convention 1989”, No.169 enggau “United Nations Declaration on the Rights of Indigenous Peoples UNDRIP, 2007”.

Andrew nambah, tu meh siti kebuah pemesai reti kuasa Kort Bumiputera tu patut sama tikas enggau Kort Civil.

Enti ditetak enggau jaku pandak ku iya, reti nya Orang Asal ba menua tu semina deka ngenan ke Adat sida ia empu aja lalu nadai niat deka ngena Adat nya kena ngemedis, ngenusah tauka ngelakar orang bukai ke sama begulai ba menua tu. — DayakDaily