Anang ngubah sejarah Bujang Berani sepeneka ati

Panglima Gagah Berani Major (B) Michael Riman (kanan) benung berandau enggau pemansik Dr Regina ari Universiti Malaysia Sarawak.

Follow and subscribe to DayakDaily on Telegram for faster news updates.


KUCHING, 27 Jun: Sejarah ngayankan bala Bujang Berani ti nyadi sedadu suah berambunka nyawa ngetan menua ari dilanggar munsuh ba bulan Enam, iya nya maya kitai ngintu Hari Gawai lalu ditangkankan enggau Ngiling Bidai.

Nitihka pemansik sejarah Profesor Madya Dr Neilson Ilan Mersat, kelimpah ari nya bisi mega orang ti ngembuan penemu ngerichau sereta deka ngasuh sejarah tu bebalut lalu madahka nama bala komunis mega sama tau ditantaika kitai lalu dikumbai Bujang Berani.

Ku Neilson ke nyadi siku lecturer ba Universiti Malaysia Sarawak (Unimas), penemu ti baka nya sigi kelalu mabu sereta nadai bepelasar ba sejarah menua ti amat.


Berindik enggau nya, iya mai ngenang sejarah tiga iku Bujang Berani ti udah nerima gelar Panglima Gagah Berani (PGB) alai sida udah nyemetak mandangka pengawa ti dikereja lebuh kitai bala mayuh begawai dalam bulan Enam ba taun 1971 enggau 1979 menya.

“Malam ti dulu agi ari nya bala sida PGB Ex-Lans Koperal Bajau Anak Ladi semina sempat ngirup ai pengayu kena nyambut Gawai.

“Hari siti iya nya 1 Jun 1971 sida lalu dibai orang nurun ngiga munsuh di Ulu Kinta, Perak. Nitihka penerang ti diberi orang ba menua nya, bala komunis bisi kem besai lalu mayuh bekupan dia,” ku Neilson.

PGB Bajau sama dibai orang enggau operasi ti dikumbai Operasi Iblis.

Laban ti udah tepelasuk masuk kem munsuh ti dipelabaka enda kurang ari 40 iku, diak alai sida betubuh lima balat betimbak ngelaban komunis.

Ku Neilson, laban tubuh ti mimit sida enda ulih nyerang ngalahka munsuh.

“Ketuai sida iya nya Kapten Mohana kena timbak munsuh lalu enda tepadaka nyawa mutuska seput udah bekau kena timbak ba pala.

“PGB Bajau ti agi nguji malas betimbak ngelaban munsuh nyau kepuas iya bakal kena timbak.

“Baka berai ai mata aku ngenatka pemedis nya sereta ngira diri enda ulih idup enti munsuh nemu kami laban tubuh munsuh mayuh” ko Neilson nusuika cherita PGB Bajau.

Pengudah hari nyau majak lemai seharinya, PGB Bajau enggau dua iku bala renjer sama bejalai semalam-malamnya nyurutka diri ngiga alai minta tulung bala bukai.

PGB Bajau balat bakal lalu iya ulih dua iku raban iya ngiring lebuh ti bejalai. Taja pia sida udah mandangka pemerani ti tinggi lalu bepegai tegut ba semaya “Agi Idup Agi Ngelaban”.

Penusah ke ditapi sida PGB Bajau di Ulu Kinta ditemu kem besai sedadu alai PGB Ex-Koperal Sigai anak Nyawan dianjung ngesah sereta meri bantu.

Lebuh ti beasuh-asuh nurun dulu ari helikopter di Ulu Kinta diak alai PGB Sigai lalu minta diri nurun terjun dulu.

Iya ti nurun semina ngena tali ari bilun sigi naka penangi laban enggaika ditimbak munsuh lebuh maya nurun.

“Kami nangika munsuh agi mayuh lalu enggaika nimbak kami lebuh nurun ngena tali.

“Aku sigi minta terjun dulu laban pengawa nyadi sedadu tu ba runding aku sigi nadai bukai, tang nyabung pemerani. Semengat sigi digenggam laban ati balat rawan,” ku PGB Sigai.

PGB Sigai tetap berani lalu bepegai ba semangat ‘Agi Idup Agi Ngelaban’ alai iya ampit betachah ngelaban munsuh ba pengawa nginau dudi agi ari tu sereta diberi pangkat tanda berani iya nya Paglima Gagah Berani (PGB).

Nitihka Neilson agi, betul-betul maya hari kena 1 Jun 1979, PGB Major (B) Michael Riman enggau bala iya tetemuka kem komunis lalu betachah enggau munsuh naka iya pemalat ba Kampung Galau Korbu Lasah.

Lebuh maya nya PGB Michael balat endar bakal. Iya enda ngira diri idup lalu semina bangkai aja meh dibai pulai laban pemalat sida ti betimbak enggau munsuh.

Bisi bala raban iya ti kena timbak lalu parai sereta bisi mega sekeda bakal.  Bala sida PGB Michael sigi nadai surut tang majak mansangka mua betachah enggau komunis.

Lebuh ti ngansak ngagai munsuh, PGB Michael mega bisi nimbak lalu munuh siku indu komunis ti baru deka ngambi senapang dikena nimbak iya.

Seninjik endar iya jampat agi meda indu nya ti deka ngambi senapang alai iya lalu merejin sereta nimbak indu ti ngujungka munsuh nya lalu rebah.

“Aku nadai berasai nesal udah nimbak komunis nya taja pan iya indu laban enti aku enda dulu, tentu aku mati ditimbak iya” ku PGB Michael.

Bekau nya, PGB Michael balat endar bakal lalu dibai ngagai sepital awakka diperubat.

Dikena ngingatka pemerani nya, diak alai iya bisi diberi pangkat Panglima Gagah Berani (PGB).

Kenang ba atas nya tadik endang sebengkah ari tibak cherita tiga iku Bujang Berani kitai Iban ti udah bebendar berambunka nyawa maya ba bulan Enam, lebuh maya kita mayuh rindang berami.

Kenang sida tiga tu sama bela disebut siku agi pemansik enggau lecturer UNIMAS Dr Regina Garai lebuh ti ngerandau sida.

Tu meh pemesai sukong bala sedadu kitai Iban dikena ngaduka pemaik enggau pengelikun menua.

Lebuh ti ngenang pemerani sida tiga tu diak alai pemansik Dr Regina madahka sida tiga tu udah mandangkan semengat Agi Idup Agi Ngelaban lalu sanggup ngenuluka pemaik enggau pengelikun menua ari ti berundingka seput enggau nyawa diri empu.

“Sacrifce sida tu patut dikingat sereta ditunda bala nembiak rebak baru,” ku Regina.

Tambah Neilson, sejarah enda ulih diubah nitihka peneka ati kitai lalu sida ti endang amat nyadi Bujang Berani lalu tetap digelar kitai Bujang Berani belama.

“Sapa ti ngembuan runding ti salah baka pengawa ngeruga pemaik pengelikun menua baka bala komunis sigi enda patut diangkat tauka dipuji dipadahka “pejuang sebenar” ukai semina diatu tang nyentukka dudi hari ila.

“Lebih agi ari nya bala komunis tu “on the wrong side of history”. Kelimpah ari nya kitai mega patut ingatka lebuh maya kitai berami gawai ba bulan Enam tu, bisi mega bala kitai ti kenanas berambunka nyawa sida baka sida PGB Major (B) Michael Riman, PGB Ex-Lans Korperal Bajau enggau PGB Ex-Koperal Sigai.

“Sida tu meh sekeda ari Bujang Berani ke patut dipuji kitai belama lama laban ngembuan ati ti berani Agi Idup Agi Ngelaban,” tandu Neilson. — DayakDaily