Atur ngubur Awang Raweng diadu nengah basa besai Perintah Sarawak

Masing lebuh dirandau pemberita di Dewan Suarah.

Dikarang Chris Bishop

KUCHING, 20 Sept: Datuk Awang Raweng sigi patut dikubur nengah basa ti besai ari Perintah Sarawak ke nyadi tanda basa pemeri iya ke menua, ku Sapit Kepala Menteri Tan Sri Dr James Jemut Masing.

Ku Masing, niang nyadi siku Bujang Berani ti nerima midul pemerani entara ke pemadu tinggi sereta udah nentuka menua tu terus likun.

“Enti Awang dipasuk ba dalam soldadu British, iya patut nerima midul Victoria Cross.

“Tang ketegal iya ti semina penyidi Iban (enda dalam soldadu British), Awang nerima midul George Cross,” ku Masing lebuh dirandau pemberita di Dewan Suarah Kuching seharitu.


Masing ke mega Menteri Infrastruktur enggau Pemansang Port nambah, rayat Sarawak meseti mereti sereta bebasaka orang ti udah berambunka nyawa ketegal ti ngenanka menua arika dilanggar munsuh.

Ku iya, pemerani ke udah dipandangka raban bujang berani menya udah ngujungka menua tu terus likun.

“Tu meh pengawa ke diadu Perintah Negeri, kitai meri basa ke pemadu tinggi ngagai niang Awang,” ku Masing.

Jabu (kiba) datai meri basa ngagai Bujang Berani Awang. Raweng.

Ngenang kaul ke sama, ex-Sapit Kepala Menteri Datuk Patinggi Alfred Jabu madah Awang entara raban bujang berani ke dulu angkat ngelaban munsuh ba jeman menua siga menya.

Ku Jabu ke bela datai ba Dewan Suarah, niang seruran nenggam semengat ‘Agi Idup Agi Ngelaban’ ti udah meri pengering ngagai iya lebuh betachah ngelaban 50 iku munsuh komunis di Johor.

“Ari pemerani ti udah dipandangka Awang sereta bala bujang berani bukai, menua kitai nyentukka diatu likun ari keruga munsuh.

“Atur nguburka niang ba Pendam Pahlawan sigi ngena lalu nyadika basa besai Perintah Sarawak ngagai iya,” ku Jabu.

Awang Raweng deka dikubur di Pendam Pahlawan di Taman Budaya urung jam 10 pagi ila.

Bela nyempulang Jabu, ADUN Layar Gerald Rentap.-DayakDaily